ТҮЦ чинь хотын өнгө үзэмж гутаагаад байна, стандартад нийцсэнээр солиул гэсэн. Жижиг, сажиг бараа зарж, амьдрал ахуйгаа залгуулдаг иргэд төрийн гаргасан шийдвэр гээд яаж ийж байгаад л ТҮЦ-ээ шинэчилсэн. Тухайн үеийн нийслэлийн удирдлагуудыг нэг их буруутгаагүй. Угаасаа би л ТҮЦ ажиллуулдаг гээд навсайсан, хотын өнгө үзэмжийг гутаасан амбаарт суугаад байж болохгүй л дээ. Түүнийгээ ч иргэд ойлгосон байх, ямар ч байсан чадахаасаа чадахгүйгээ хүртэл зүтгэж байгаад ТҮЦ-ээ шинэчилсэн. Сардаа ганц нэгхэн сая төгрөгөөр хэмжигдэх, магадгүй түүнээс ч бага орлоготой иргэд яаж зүтгэж байж ТҮЦ-ээ сольсоныг хүмүүс мэднэ ээ.

Гэтэл шинэ удирдлагууд гарч ирээд, өнөөх солиулсан ТҮЦ-ийг нь буулгаж, нүүлгэж, ачиж, хурааж бөөн юм болов. Худалдагчаар нь мэргэжлийн бус хүн ажиллаж байна, дотроо бие засах газаргүй энэ тэр гэсэн мэр сэр шалтаг, шалтгаан тоочоод л буулгаж, ачиж, нүүлгэсэн. Уг нь өнгө үзэмж сайтай ТҮЦ байрлуул гээд л бөөн юм болгож сольсон.  Зарим хүмүүс нь ТҮЦ-ээ шинэчлэхээр авсан байсан зээлээ ч дарж чадаагүй л яваа. Гэтэл дахиад янз бүрийн шалгуур тавиад, хөөж туугаад байгаа нь яаж байгаа юм, бүү мэд. Мэргэжлийн үнэмлэхтэй худалдагч ТҮЦ дотор суулаа ч яалаа, байлаа ч яалаа. Шалтаг эрнэ гэхэд арай дэндэж байна.

Харин бие засах газрын асуудал бол байж болох л шалтаг. Ихэнх нь ойр орчмынхоо байгаа аж ахуйн нэгжийн бие засах газар руу гүйчихдэг байх. Эрэгтэй худалдагчтай бол эвтэйхэн газар олоод, гадаа сарьчихдаг байхыг ч үгүйсгэхгүй. Гэхдээ бие засах газрын асуудлыг шийдэж цөхөөд байх юмгүй. Одоо эко 00 гээд зөндөө л гарчихсан. Нэг жаахан булан гаргаад, хаалгатай болгоод, шийдчихэж болно л доо. Хамгийн гол нь тэгэх боломжийг иргэдэд өгөх хэрэгтэй. ТҮЦ-ээ шинэчлэхээр зээл авчихсан бол түүнийг дуусахыг хүлээсэн ч болно. Хэрвээ иргэдээ бодсон бол шүү дээ. Гэтэл дарга нар иргэдээ бодсонгүй, шууд л хүчээр шийдчихлээ. Бүр хөгшин настай хүнийг ухаан алдаж унагаж, амь нас, эрүүл мэндэд нь заналхийлж, бүр хүнтэй нь цуг ТҮЦ-ийг нь ачсан.

Гэтэл энэ бүхний чинь цаана бизнес байсан юм биш үү. Сүүлийн үед ТҮЦ-ээ буцааж байранд нь тавьмаар байвал 15 саяыг өгчих гэсэн сураг гараад байна. Ингээд бичихээр би ч тэгээгүй, ёстой тийм юм байхгүй, нэр төрд халдлаа гээд л хашгичих байх л даа. Улаанбаатарт ТҮЦ ажиллуулдаг олон хүн бий. Тэр дунд 15 саяыг өгчихвөл ТҮЦ-ээ буцаагаад тавьчихаж болно шүү гэсэн санал авсан хүмүүс байна, цаана чинь. Хотын удирдлагууд аа, мэдээж та бүхэн стандарт шаардлага тавьж л ТҮЦ-ийг нүүлгэх шийдвэр гаргасан байх. Гэтэл дунд шатныхан чинь иймэрхүү маягаар бизнес хийх гээд л яваа сурагтай. Энэ тал дээр жаахан анхаарал хандуулвал яасан юм бэ. 

Ерөөсөө хаа сайгүй төрийн ажлыг дунд шатныхан сүйтгэж, хамгийн их авлига, хээл хахууль авч, хууль журмыг уландаа гишгэдэг.  Тэднийгээ жаахан “хазаар”-лаарай. Өнөөдөр ард түмний амьдрал ямар байгаа билээ. ТҮЦ ажиллуулж байгаа хэдэн хүн төрөөс юу ч гуйгаагүй. ТҮЦ бариад өгөөч гэж гуйгаагүй нь лав. Эсвэл ТҮЦ дотор тавих бараа аваад өгөөч гээгүй л байх. Харин ч өөрсдийнхөө бор зүрхээр, чадлаар жижиг ч болов “юм” ажиллуулаад, ар гэрээ аваад явж байгаа. Гэтэл янз бүрийн шалтаг шалтгаанаар дайрч, давшилж, хурааж, ачиж явчихаад дараа нь авлига авах гээд л өрвөлзөөд байж болохгүй биз дээ. Одоо жаахан шударга байцгаая л даа, энэ чинь. Ард түмнээ жаахан бодооч ээ. Мэдээж улсын хууль, журмыг дагаж мөрдөлгүй л яах вэ. Гэхдээ журам гаргаж, түүнийгээ авлигын хэрэгсэл болговол бас болохгүй л дээ.