Өнөөдөр олны сонирхлыг татсан нэгэн үйл явдал болсон нь Монгол Улсын гавьяат эдийн засагч Б.Осоргарав Монголын ард түмэн, бүх аж ахуйн нэгж, байгууллагад хандаж эх орноо эдийн засгийн хүндрэлээс гаргахын төлөө хандивын хөдөлгөөн өрнүүлж байгаагаа мэдэгдсэн явдал юм.

Тэрбээр “Эх орныхоо төлөө” сан хэмээх сан байгуулсан бөгөөд эдийн засаг нь элгээрээ хэвтчихээд байгаа эх орноо аврах хөдөлгөөнд найман настай балчираас 80 настай буурал хүртэл, ажил мэргэжил, нас хүйс харгалзахгүй идэвхитэй оролцож нэгдэхийг уриалсан юм.

Дээхэн үед БНСУ-ын хүнд үеүдэд иргэд нь ээмэг, бөгжөө мулталж өгөөд л эдийн засаг нь иргэдийнхээ дэмжлэгтэйгээр өндийсөн талаар өнөөдрийг хүртэл түүх домог мэт ярьсаар байдаг билээ. Иргэдийнх нь эдийн засгийн боловсрол ийм өндөр төвшинд учраас Солонгос өнөөдөр дэлхийн томоохон улсуудын нэг болчихсон биз.

Ийм утга санааг агуулж, эдийн засагч Б.Осоргарав тооцоо судалгаа хийсэн биз. Түүний тооцоолсноор 8-30 хүртэл насны хүмүүс 1000 төгрөгөөс өссөөр 23 мянга /найман настай бол 1000, есөн настай бол 2000 гэх мэтээр 30 хүртэл 1000 төгрөгөөр өсгөн/, 31- 40 насны хүмүүс 150.000 төгрөг, 41- 50 насны хүмүүс 200.000, 51-ээс 60 насны хүмүүс 150.000, 61-70 насны хүмүүс 50.000, 71-ээс дээш насны хүмүүс тус бүр 20.000 төгрөг хандивлахад 214 тэрбум төгрөг хуримтлуулж одоогийн үүсээд буй эдийн засгийн түр хямралаас гарах боломжтой гэж байна.

Мөн иргэдээс гадна төрийн дунд болон өндөр албан тушаалтнууд, мөн аж ахуйн нэгжүүдээс албан тушаал, орлогын зөрөөг харгалзан ялгавартай хандив авбал 425 тэрбум төгрөг цугларах боломжтой гэж тооцжээ. Түүнчлэн хандиваас гадна оффшор бүсэд байршуулсан мөнгийг Монголдоо оруулж ирэх хуулийг яаралтай батлан гаргаж нэгдүгээр улиралдаа багтаан Монголдоо оруулж ирүүлсэн байх заалтыг хуульчлах, энэхүү хуулиар оффшор бүсээс мөнгө хөрөнгөө оруулж ирсэн хүмүүс, аж ахуй нэгжид ямар нэг хуулийн хариуцлага тооцохгүй байх заалт оруулах саналтай байгаагаа ч хэлж байсан.

Тэрбээр мэдэгдлийнхээ төгсгөлд “Эх орныхоо төлөө” санд өөрийн зүгээс 10 сая төгрөг, 10 адуу, алтан бөгжөө хандивлаж, уг санд хандив тусламж өгсөн хүмүүс, аж ахуйн нэгж, байгууллагуудыг хэвлэлээр сар бүр олон нийтэд мэдээлж, цугласан мөнгийг төр засгийн эрх бүхий байгууллагуудын тодорхой албан тушаалтнуудад олон нийтийн өмнө хүлээлгэн өгч байх болно гээд Төрийн банк 104400420823, Хаан банк 5014452956 тоот хандивын дансанд мөнгөө хийхийг уриалсан.

Үнэндээ манай улс иргэдээсээ гуйх биш газрын гүндээ асар их баялагтай, тэр баялгаа түшиглэн илүү их хөгжих боломж бүрэн бий. Үүнийгээ дагаад ч иргэдийн амьдрал сайхан болох учиртай. Гэтэл үнэндээ алтан дээр сандайлсан гуйлгачин нэрэндээ дасчихаад, арчаагүй төрийн бай болоод байгааг мэдэж байгаа биз дээ. Ойрын жишээ гэхэд Катар улс байна шүү дээ. Сүүлийн 10 гаруйхан жилийн дотор үсрэнгүй хөгжиж чадсан улсуудын нэг. Хамгийн гол нь катар хүн бүр баян байна. Харин манай улсад яг өнөөгийн байдлаар гэвэл ард түмэн нь ядуу, цөөн хэдхэн хүн л баян байна. Уг нь байгалийн баялгаараа бодоод үзвэл Монгол Улс Катараас дутахааргүй баян, монгол хүн катарчуудаас дутахгүй "чөмөгтэй" баймаар. Ердөө л зөв бодлого, зөв засаглал дутаад байгаа шүү дээ.

Түүнээс биш иргэдээсээ гуйж, ээмэг бөгжийг нь авах дээрээ тулаагүй л байлтай. Төр засаг ичих нүүртэй байх хэрэгтэй шүү дээ.