Засгийн газраас гэр хорооллын өрхийн шөнийн цахилгааны тарифыг 100 хувь хөнгөлөх шийдвэр гаргасан билээ. Ингэснээр утааны эсрэг дорвитой арга хэмжээ авч байгаа хэмээн мэдэгдсэн. Хүн бүр л хамгийн зөв шийдвэр боллоо хэмээн шаагилдаж, цахилгаанаар халаалтаа шийдэхийг уриалсан. Хэвлэл бүр дэмжиж байлаа. Ерөөс Засгийн газрын шийдвэр гарахад л гэр хорооллын шөнийн цахилгааны тарифыг 100 хувь хөнгөлнө гээд л бүгд ойлгочихсон. Бүр тодорхой хэлбэл, оройны 21:00 цагаас өглөө 06:00 цаг хүртэл хэрэглэсэн бүхий л хэрэглээг 100 хувь хөнгөлөх нь гэж ойлгосон. Ингээд л цөөнгүй айл яндангаасаа татгалзаж, цахилгаан халаагуур тавьсан.

Гэтэл сая хоёрдугаар сарын ихээр цахилгааны мөнгөө төлөх болоход маш өндөр төлбөр гарч, нүд нь орой дээрээ гарахгүй юу. Саяхан нэг хэрэглэгч манай редакцид хандаж, шөнийн хөнгөлөлт гэж үнэн юм уу, манай цахилгааны мөнгө сая төгрөг гарлаа. Цахилгаан түгээхээс асуухаар 50 хувь ч гэнэ үү, нэг юм яриад байна хэмээн гомдол мэдүүлэв. Тэгэхээр учрыг нь лавлаж, Улаанбаатар цахилгаан түгээхээс тодрууллаа. Гэтэл цахилгааны шөнийн тарифыг угаасаа эхнээсээ л 100 хувь хөнгөлөөгүй юм байна. Дүрэм, журам нь ч гэсэн 100 хувь хөнгөлнө гэж гараагүй аж. Үндсэндээ Засгийн газар зүгээр баахан хөөргөчихөж гэж ойлгож болохоор. Нөгөө талдаа дүрэм, журмыг нь маш сайн нягтлаагүй нь иргэдийн буруу байх. Маш сайн нягталж мэдээлээгүй хэвлэл мэдээллийнхний ч буруу бас байгаа.

Улаанбаатар цахилгаан түгээх сүлжээ ТӨХК-ийн гаргасан журам дээр  Цахилгааны шөнийн тарифыг 21-06 цагийн хооронд мөрдөх бөгөөд 100 хувийн хөнгөлөлтийг нийслэлийн агаарын чанарыг сайжруулах бүсэд хамаарах гэр хорооллын тарифт электрон тоолууртай айл өрхүүд эдэлнэ гээд биччихсэн байгаа. Хүмүүс ерөөс 100 хувь хөнгөлөх юм байна гэж бодохоор. Харин цааш нь илүү нягтлаад уншвал “Эдгээр айл өрхүүдийн хөнгөлөлт тооцох сарын хэрэглээний дээд хязгаар холбогдсон цахилгааны хүчдэлийн түвшнээс шалтгаалан 220В бол 700кВт.цаг, 380В бол 1500кВт.цаг байх юм. Үүнээс дээш гарсан хэрэглээг 50 хувийн хөнгөлөлттэй тарифаар буюу 38.55 төгрөгөөр тооцно” гэж журамд заачихсан. Тэгэхээр хэрвээ танайх 220-ын тоолууртай бол шөнөдөө 700 кВт.цаг цахилгаан хэрэглэж байж л 100 хувь хөнгөлүүлнэ. Харин 380-ын тоолууртай бол 1500 кВт.цаг хэрэглэх л боломжтой, түүнээс давбал өөрөө төлнө. Гэхдээ 50 хувиар хөнгөлж төлнө л дөө.

Одоо бүр тодорхой тайлбарлая, танайх 220-ын тоолууртай байлаа гэж бодъё. Тэгээд сардаа шөнийн тариф чинь 1700 кВт.цаг болжээ гэж саная. Энэ тохиолдолд 700 нь 100 хувь хөнгөлөгдөнө. Харин үлдсэн 1000 кВт-ын мөнгөө та тарифын 50 хувиар бодож өгөх юм. Тэгэхээр 100 хувь хөнгөлүүлнэ гэвэл 700 кВт.цагаас илүү хэрэглэхгүй л байх шаардлагатай болох нь. Үүнийг бол 100 хувийн хөнгөлөлт гэж огт ойлгож болохгүй л дээ. За тэгээд агаарын бохирдолгүй бүсэд амьдарч байгаа бол хөнгөлөлтөд огт хамрагдахгүй гэдгийг бас санахад илүүдэхгүй байх. 

Хэрвээ танайх цахилгаан халаагуур нэгэнт хэрэглээд эхэлсэн бол жаахан ариг гамтай л байхгүй бол болохгүй нь. Эсвэл шөнө халаасан дулаанаа өдөртөө хадгалдаг, арай өөр смарт маягийн халаагч хэрэглэх хэрэгтэй байх. Тэгэхгүй бол цахилгааны мөнгөндөө дарлуулаад дуусах юм байна. Уг нь ганц ч болов яндан цөөрч байвал тун сайнсан. Гэвч төр засгийнхан 100 хувь гэдэг дээр иргэдийн толгойг эргүүлж, энэ мэтээр далаар нь тавиад байвал яах болж байна аа. Хөнгөлөх гэж байгаа бол нэг мөр л юм хийгээч дээ.