Н.Энхбаярын “оймсонд хавчуулагдаж” УИХ-ын босгыг алхсан гэгдэн чичлүүлж байсан хүн бол О.Баасанхүү. Тэрбээр өнгөрсөн дөрвөн жил ингэж хэлүүлж байсан ч энэ удаад харин ч МАХН-ыг Ерөнхийлөгчийн сонгуульд оролцуулах "алтан тасалбар"-ыг атгуулсан ачтан болоод байгаа. Тэгвэл МАХН-ын дарга Н.Энхбаяр гуай өөрөө Ерөнхийлөгчийн сонгуульд оролцох эрхгүй болчихсон болохоор өөр нэгнийг тархиндаа тээгээд удаж байгаа гэнэ шүү. Үнэндээ эдний намд үзээд өгье ч гэх нь ээ Ерөнхийлөгчид сойчих хүн байхгүй нь үнэн. Тэгээд гаднаас хайхаас аргагүйд хүрсэн байж таараа. 

Өөрөөр хэлбэл, 45 нас хүрчихсэн ард түмэнд нэгэнт танигдчихсан өөрийн талын хүнийг хайж байгаа гэх. Тэгвэл энэхүү шалгуурыг нь нэгэн цагт эдийн засгийн зөвлөхөөр нь ажиллаж явсан олонд ”Фэнгшүй” Ганбаа хэмээн танигдаж, улстөрчид дунд "Босоо Ганбаа" гэгддэг байсан УИХ-ын гишүүн асан, жинхэнэ "попчин" С.Ганбаатар хангасан сурагтай. Учир нь Н.Энхбаяр түүнийг намдаа орох урилга, заллага өгөөд сүйд болж яваа юм байх. 

С.Ганбаатарын хувьд улс төрийн тавцангаас буухтайгаа зэрэгцээд нэг ч сургууль төгсөөгүй гэдэг нь олны өмнө ичгүүртэйгээр илчлэгдэж, хуурамч дипломуудтай болох нь хөдлөшгүй баримтаар нотлогдсон. Тиймээс ч тэрбээр “Дипломгүй улстөрч” хэмээх шүүмжлэлд өртсөнийхөө дараахан алс холын Америкт эдийн засгийн сургуульд сурахаар болсон тухайгаа мэдэгдээд усанд хаясан чулуу шиг хэсэгтээ л таг болсон.

Өөрөөр хэлбэл, Ерөнхийлөгчийн сонгуульд нэр дэвшихээ бусдаас түрүүнд ганцаараа зарлаад байсан “босоо гишүүн”-ий попдолт хуурамч дипломын асуудлаар цэг тавигдсан гэсэн үг. Тиймээс Н.Энхбаярын энэ удаагийн сонголт “бай”-гаа оноогүй бололтой. Хэдийгээр С.Ганбаатар 45 нас хүрсэн ч гэлээ боловсролын хувьд дутуу дулимаг түүнийг улсынхаа Ерөнхийлөгч болгох хүн хэд байх нь ойлгомжтой. Тэгээд ч С.Ганбаатарт ичих нүүр гэж байдаг бол ядаж ганц жинхэнэ диплом өвөртлөөд улс төр рүү дахин мацахаа мэдэх эсэхийг таашгүй. Тэр гаргуун попчин.

Гэхдээ түүнийг МАХН-ынхан намдаа урьсан сургаар "АН Ерөнхийлөгчийн сонгуульд ялах нь тодорхой боллоо" гэсэн "бор шувуу" нисч эхэлжээ. Угтаа энэ үнэн бол  жагсагчаас УИХ-ын гишүүн болж огцом ниссэн С.Ганбаатар МАХН, МАН-ын саналыг маш сайн хуваана гэсэн үг л дээ. Тиймээс ч энэ удаагийн Ерөнхийлөгчийн сонгууль үзэх, сонсох зүйл ихтэй, сонирхолтой болж магадгүй бололтой.