Английн алдарт зохиолч Уиллиам Шекспирийн “Ромео Жульетта” жүжгийг энэ сарын 6-8-нд Улсын драмын эрдмийн театрын тайзнаа дахин тоглохоор болжээ.

Тус жүжгийг Олон улсын эмэгтэйчүүдийн баярыг тохиолдуулан ийнхүү тоглохоор болсон аж. Гэхдээ энэ удаад жүжгийн гол дүрд өөрчлөлт орсон гэнэ. Учир нь Жульеттагийн дүрд тоглосон жүжигчин О.Дөлгөөн гэр бүлийн хамт гадаад руу явсан байна.

Тиймээс энэ удаад үзэсгэлэнт бүсгүй Жульеттад тус театрын залуу жүжигчин Г.Номуун тоглох аж. Тэрбээр өмнө нь тус жүжгийн хатагтай Монтеккид тоглож байсан юм. Тэрбээр “Ромео, Жульетта” тавигдана гэж байхад Жульеттагийн орлон жүжигчнээр шалгарч, О.Дөлгөөнтэй ээлжилж тоглохоор болсон. Эрдэнэт хотод очихдоо Жульеттагийн дүрд тоглосон. Өөрөөр хэлбэл, хоёр дахь удаагаа энэ дүрд тоглох гэж байна. Миний ээж театрын арын албанд ажилладаг тул би багаасаа театртай ойр өссөн. Тэнд тавигдаж байгаа бүх л жүжгийг шимтэн үздэг байлаа. 1996 онд Ч.Найдандорж найруулагчийн найруулсан “Ромео, Жульетта”-г тэргүүн эгнээнд суугаад уйлж үзэж байсан. Тэр үед зургаахан настай хүүхэд юу ойлгосон болоод тэгж их догдолж байсныг гайхдаг. Тухайн үед Жульеттад жүжигчин И.Одончимэг, Г.Урнаа эгч, Ромеод нь О.Гэрэлсүх, Д.Алтанбагана ах ээлжилж тоглож байсан. Дараа нь О.Дөлгөөн Жульеттад тоглосноор би дөрөв дэх Жульетта болж байна. Өмнөх Жульетта нараас юугаараа ялгарахыг үзэгчид л хэлэх байх даа. Гуравдугаар сарыг манай театр сонгодог жүжгийн сар болгон зарласан. Жүжиг маань гуравдугаар сарын 6-8-нд тоглогдох болно" хэмээн ярьжээ. Жүжигчин Г.Номуун “Гэгээн Муза” наадмаас нэг хүний жүжгийн төрөлд “Хатагтай Капульетта” жүжгээр  шилдэг эмэгтэй жүжигчин болж байсан юм.

Ийнхүү Олон улсын эмэгтэйчүүдийн баярын өдрүүдэд Улсын драмын эрдмийн театрын найруулагч Төрийн соёрхолт Н.Наранбаатарын найруулан тавьсан "Ромео Жульетта" жүжгийг үзэх боломжтой боллоо.

Дашрамд сонирхуулахад тус театрынхан гуравдугаар сард дэлхийн сонгодог жүжгийн өдрүүд зарласан гэнэ. Энэхүү өдрийн хүрээнд Шекспирийн “Ромео Жульетта”, "Гамлет", Софоклын “Эдип”, Г.Ибсений “Нора”, Сервантесийн "Кихот ноён", В.Хюгогийн "Парисын дарь эхийн сүм" зэрэг жүжгүүдийг тоглох юм байна.