Манай улсын иргэд жил бүр өөрийн хүсэлтийн дагуу БНСУ-д гэрээгээр ажилладаг билээ. Энэ жил БНСУ-аас 2017 онд бүртгэх хүнийг тоо 8000 хэмээн тогтоосон аж. Үүнээс 1500 хүнийг сонгон шалгаруулж авах юм байна. Тиймээс иргэдийн тэнцэх оноо өндөр байхаар харагдаж буй учраас зөвхөн солонгос хэлтэй эсвэл солонгос хэлний шалгалтад сайтар бэлдсэн иргэд бүртгүүлэхийг холбогдох байгууллагаас зөвлөжээ.

Харин тус улсад гэрээгээр ажиллах хүсэлтэй иргэдийн 13 дахь удаагийн  солонгос хэлний түвшин тогтоох шалгалтын бүртгэл  энэ сарын 6-нд эхлэх юм байна. Бүртгэл энэ сарын 6, 7, 9-нд явагдах бөгөөд 08:30-12:30, 13:30-17:30 цагийн хооронд болох ажээ. Мөн бүртгэлийг байнгын оршин суугаа хаягийн дагуу харъяалагдах аймаг, дүүргийн Хөдөлмөр, халамжийн үйлчилгээний газар, хэлтсүүдэд өөрийн биеэр очиж бүртгүүлэх ёстой юм байна.

Солонгос хэлний түвшин тогтоох шалгалтад бүртгүүлэх иргэдэд 18-39 настай байх (1977 оны 3 дугаар сарын 7-ноос 1999 оны 3 дугаар сарын 6-ны хооронд төрсөн иргэд, хорих ялтай эсвэл түүнээс илүү хүнд ялтай гэмт хэрэгт холбогдоогүй байх, Солонгос улсаас албадан гаргах буюу тус улсыг орхин явах захирамж гаргуулж байгаагүй байх, Монгол Улсаас гарах эрхээ хязгаарлуулаагүй байх зэрэг шаардлагыг тавьжээ. Ингээд бүртгэлийн бичиг баримтын талаархи дэлгэрэнгүй мэдээллийг хүргэе.

• -Бүртгэлийн маягт- /Бүртгэл явагдах газраас иргэдэд үнэгүй олгоно/
• -Бүртгэлийн маягтыг англи хэл дээр гаргацтай, дармал үсгээр бичих ба овог нэр, төрсөн огноо, бичиг баримтын дугаар зөрөхгүй байх;
• -Иргэний үнэмлэх, хуулбарын хамт
• -3,5 х 4,5 см хэмжээтэй 2 хувь өнгөт цээж зураг (Сүүлийн 6 сарын дотор авхуулсан байх)
• -Шалгалтын хураамж төлсөн баримт
• -Шалгалтын хураамж: 24 ам.доллартай тэнцэх төгрөгөөр тушаана.
• -Шалгалтын хураамжийг Төрийн банкны 102100514449 тоот дансанд төлж, баримтыг бүртгүүлэхээр ирэхдээ заавал авчирна. (Баримтын эх хувийг авчрах ба хуулбар авахгүй)Төлбөрийг зөвхөн бүртгэлийн хугацаанд буюу 2017 оны гуравдугаар сарын 6, 7 ,9-ний өдрүүдэд төлнө.
• -Хэрэв бүртгүүлэгч зайлшгүй шалтгаанаар бүртгэлээ цуцлах бол зөвхөн бүртгэлийн хугацаанд буюу 2017 оны гуравдугаар сарын 6-9-ний өдрүүдэд шалгалтын хураамжийг буцаан олгоно. Бүртгэлийн дараа хураамж буцаан олгохгүй. (Жич: нөхөн бүртгэхгүй болно)