Л.Пүрэвсүрэн сайд Турк улсад эмгэнэл илэрхийллээ
Бүгд Найрамдах Турк Улсын Истанбул хотын Ататурк олон улсын нисэх онгоцны буудалд зургаадугаар сарын 28-ны өдөр террорист халдлага гарч, 36 хүний амь эрсэдсэн харамсалтай хэрэг гарсан билээ. Монгол Улсын Гадаад хэргийн яам цаг тухайд нь шуурхай мэдээлэл дамжуулж, энэхүү халдлагад Монгол Улсын иргэд өртөөгүй гэдгийг мэдээлсэн. Тэгвэл дипломат харилцаатай байдаг Турк улсад андын хувиар Монгол Улс эмгэнэл илэрхийлсэн байна.
Тодруулбал, Гадаад хэргийн сайд Л.Пүрэвсүрэн БНТУ-ын Гадаад хэргийн сайд Мевлүт Чавушолуд эмгэнэлийн захидал хүргүүлжээ.
Тэрбээр захидалдаа “Истанбул хотын Ататурк онгоцны буудалд болсон террорист цуврал халдлагад олон эрдэнэт хүний амь нас эрсэдсэнд танд болон танаар уламжлан амь үрэгдэгсдийн ар гэр, төрөл төрөгсдөд гүн эмгэнэл илэрхийлье. Монгол Улс терроризмын аливаа хэлбэрийг ямагт буруушаасаар ирсэн билээ” хэмээжээ.
Монгол Улс Ерөнхийлөгчийн санаачилгаар төвийг сахих бодлого барих болсон бөгөөд энэ нь цэрэг дайны болон олон улсын хэмжээний асуудалд хэт нэг талыг баримтлахгүй гэсэн бодлого юм. Гэвч манай улс террорист халдлага, хүний эрхийг ноцтой зөрчсөн асуудлаар үргэлж дуу хоолойгоо гаргаж ирсэн улс юм.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
