2016 онд 1130 хүүхэд түлэгдсэн гэх шалтгаанаар ГССҮТ-д ханджээ. Тэдний хэд нь халуун тогоонд түлэгдэж, эмнэлгийн орон дээр шаналж хэвтсэн бол, хөөрхий. Яг тийм нарийн тоо алга. Гэхдээ л түлэгдэж байгаа хүүхдүүдийн ихэнх хувь нь халуун тогоонд гар, хөл, биеэ түлж байгаа гэдэг нь л тодорхой. Ер нь бол 2016 онд 1130 хүүхэд түлэгдсэний 112 нь халуун хоол, цайнд өртчихсөн байгаа юм. Тэдний ихэнх нь л хоолоо урд хөршөөс орж ирсэн халуун тогоонд хийж байсан байх магадлал өндөр. 

Ядаж байхад импортын халуун тогоонд хийж буй хоол, цайнд түлэгдсэн хүүхдүүд ихэнхдээ 40-өөс дээш хувиар түлэгддэг учир амь насанд нь аюул учруулах эрсдэл хамгийн өндөр байдаг талаар эмч, мэргэжилтнүүд хэлдэг. Ядаж байхад халуун тогоог ихэвчлэн газар тавьж, хоол, цайгаа хийдэг болохоор бага насны хүүхдүүд түлэгдэх эрсдэлийг илүүтэй нэмээд байгаа юм.  Энд дахиад нэг харамсалтай тоо баримт дурьдая. 2016 онд 0-5 насны 56 хүүхэд халуун тогоонд буцалж байсан хоол, цайнд түлэгдсэний улмаас амиа алдсан байна. Дөнгөж хорвоотой танилцаж байгаа бяцхан үрс ийм олноороо ердөө л халуун, хоол цайнд түлэгдэж, нас барж байгаа нь аймшигтай биш үү.

Ядаж байхад манай улсад Түлэнхийн төв битгий хэл эмнэлэг ч алга. Эрх мэдэлтнүүд мөнгө төгрөгийг нь хаашаа хийсэн нь мэдэгдэхгүй, газрыг нь хувааж авах гээд байгаа ч юм шиг байсаар өнөөдрийг хүрсэн. Түлэнхийн төв ГССҮТ-ийн нэг буланд наалдсан байдалтай л байгаа.  Ядаж байхад улсаас урьдчилан сэргийлэх тал дээр ямар ч ажил хийхгүй байна. Тэр битгий хэл нийгмийн шинжтэй сурталчилгаа хийхэд хүртэл хойрго хандаж байгаа шүү дээ. Түүний оронд эцэг, эхчүүдийг хараа хяналтаа сулруулсан, хүүхдээ асарч чадсангүй гэж буруутгахын урьтал болгодог. Мэдээж эцэг, эхчүүдээс тодорхой хэмжээнд хариуцлага шаардах ёстой. Гэхдээ гэнэтийн зүйл гэдэг хийсээд л ирдэг шүү дээ.

Тийм болохоор Түлэнхийн төв энэ тэр ярьж суухын оронд эхний ээлжинд хилээр халуун тогоо оруулж ирэхийг хориглоё. Хятадаас оруулж ирж байгаа халуун тогоо хурдан буцалдгаас бусдаар бол ямар ч хэрэггүй, эрүүл мэндэд хортой эд. Ядаж байхад хүүхэд халуун тогоонд түлэгдэхэд бусад зүйлтэй харьцуулахад хамаагүй хүнд түлэгдэлт аваад байна. 40-өөс дээш хувиар түлэгддэг талаар дээр дурьдсан шүү дээ. Ийм тогоо хэрэглэж яах юм бэ. Хүмүүс ухамсраараа хэрэглэхгүй гээд больчихгүй байна. Тийм болохоор шууд хориглоё л доо. Ийм шийдвэр гаргачих эрх мэдэлтэн манайд алга уу. Халуун тогоог хориглож чадахгүй бяцхан үрсийнхээ эрүүл мэнд, амь насыг алдсаар байх хэрэг үү.

Гэр хорооллын иргэд өвөлдөө гал түлчихэж байгаа. Гал дээрээ тогоогоо тавиад, хоолоо хийгээд, цайгаа чаначихаж болно. Өмнө нь ч тийм л байсан. Халуун тогоогүй боллоо гээд хоол, цайгаа хийж идэж чадахаа болив л гэж. Гал дээр тогоогоо тавиад, хоол, цайгаа хийж байх үед хүүхдүүд түлэгдээд байна гэж байхгүй. Зундаа бол цахилгаан зуух тавьчихаж болно. Сүүлийн үед цахилгаан бага хэрэглэдэг, индукцэн плетьканууд янз бүрээрээ л гарчихлаа. Халуун тогооноос нэг их үнэтэй байж алахгүй шүү дээ. Гэх мэтээр үр хүүхдээ бодвол хаана хаанаа л халуун тогоог халмаар байна.

Гэр хорооллын айлуудын зарим ухамсартай нь халуун тогоонд хүүхэд хүрэхээргүй болгоод, хашчихсан байж л байна. Халуун тогоо ч байна уу, цахилгаан зуух ч хэрэглэнэ үү хамаагүй, тэр жишгийг гэр хорооллын айлууд ашиглах хэрэгтэй. Тэр дундаа гэрт амьдардаг бол. За тэгээд хамгийн зөв арга бол халуун тогооны импортыг л хоригломоор байна даа, гаалийнхан минь.