Монгол Улсын Ерөнхий сайдыг томилох асуудлыг хэлэлцэхээр төлөвлөж байна

Монгол Улсын Ерөнхий сайдыг томилох асуудлыг хэлэлцэхээр төлөвлөж байна

УИХ-ын 2020 оны сонгуулийн дүнгээр байгуулагдсан парламентын анхны чуулган өнөөдөр гуравдахь өдрөө хуралдана. Анхдугаар чуулганы эхний өдөр 75 гишүүн тангаргаа өргөж, УИХ-ын даргаа сонгон, бүрэн эрхээ хэрэгжүүлж эхэлсэн бол өчигдрийн хуралдаанаар УИХ-ын Байнгын хороодын бүрэлдэхүүнийг баталж, Улсын Их Хурлын дэд дарга нарыг сонгосон юм.

Харин өнөөдрийн хуралдаанаар Монгол Улсын Ерөнхий сайдыг томилох асуудлыг хэлэлцэхээр төлөвлөж байна. Тухайлбал, долоодугаар сарын 02-ны 09 цагт УИХ-ын Төрийн байгуулалтын байнгын хороо хуралдаж МАН-аас Монгол Улсын Ерөнхий сайдад нэр дэвшүүлсэн У.Хүрэлсүхийг томилох асуудлыг хэлэлцэнэ. Үргэлжлүүлээд 10 цагт чуулганы нэгдсэн хуралдааныг зарлажээ.

Өчигдөр хуралдсан МАН-ын VII бага хурлаас Ерөнхий сайдад намын дарга У.Хүрэлсүхийг нэр дэвшүүлэхээр 100 хувь санал нэгдэж, зөвшилцөх саналаа Монгол Улсын Ерөнхийлөгч Х.Баттулгад өргөн барьсан юм.

Өнөөдрийн хуралдаанаар мөн Улсын Их Хурлын гишүүний халдашгүй байдлын дэд хорооны бүрэлдэхүүнийг батлахаар төлөвлөж байна. Халдашгүй байдлын дэд хороо нь УИХ-д хамгийн олон удаа сонгогдсон таван гишүүнээс бүрдэх бөгөөд гишүүний бүрэн эрхийг түдгэлзүүлэх асуудлаар хуульд заасан эрх бүхий байгууллага, албан тушаалтнаас УИХ-д ирүүлсэн саналыг судалж, санал дүгнэлт гарган зохих Байнгын хорооны болон нэгдсэн хуралдаанд оруулах чиг үүрэгтэйгээр ажилладаг.

ХОЛБООТОЙ МЭДЭЭ
МЭДЭЭНИЙ СЭТГЭГДЭЛ

АНХААРУУЛГА:Уншигчдын бичсэн сэтгэгдэлд mminfo.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99998796 утсаар хүлээн авна.