744 тэрбум төгрөгийн үнэтэй долоон концессын асуудал яг одоо нийгмийн анхаарал татсан сэдэв болоод буй. Засгийн газрын сайдуудын эрх ашиг туссан энэ асуудлаар МАН-ын бүлэг дотооддоо хуваагдсан нь бүлгийн хуралдаанаас илхэн болсон билээ. Тодруулбал, Ц.Нямдорж тэргүүтэй хэсэг бүлэг болон Ерөнхий сайд Ж.Эрдэнэбатын талд нэг хэсэг нь орчихоод буй. Тухайлбал, бүлгийн хуралдааны үеэр УИХ-ын гишүүн, ХНХ-ын сайд Н.Номтойбаярын аавын эзэмшдэг Цагаан суваргын орд газрын асуудал хөндөгдсөн аж.

Тодруулбал, “Оюутолгой-Цагаан суварга чиглэлийн агаарын шугам, дэд станц төсөл”-ийн концессын гэрээ маргааны нэг сэдэв байсан ажээ. Төсөвт өртөг нь монгол мөнгөөр 78 тэрбум 752 сая төгрөг бөгөөд уг төслийг үргэлжлүүлэх шийдвэрийг Засгийн газраас өнгөрсөн оны арваннэгдүгээр сарын 26-ны өдөр гаргаж байсан аж.

Гэтэл хувьд очсон орд газрынхаа цахилгааныг хувийн компани өөрөө хийх ёстой гэсэн байр суурийг Ц.Нямдорж гишүүн гаргаж, маргаан үүссэн аж. Ц.Нямдорж гишүүн хэвлэлд өгсөн ярилцлагадаа хүртэл Н.Номтойбаяр сайдын эрх мэдлээр далайлгаж, төрөөр эрчим хүчээ тавиулах гэж улайрч байна гэсэн утгатай зүйл ярьсан билээ. Тэгвэл өнгөрөгч баасан гарагт Н.Номтойбаяр сайд Ц.Нямдорж гишүүнтэй уулзсан гэх мэдээлэл байна.

Албан бус эх сурвалжийн хэлж буйгаар Н.Номтойбаяр сайд “Миний аавын бизнес надад огт хамаагүй. Тэгээд ч би эрх мэдлээр далайлгаж концессын гэрээгээр эрчим хүчээ тавиулах гэж байгаа гэсэн баримт таньд байгаа бол хоёулаа хэвлэлийн хурал хийе” хэмээжээ. Харин Ц.Нямдорж гишүүн бусад сайдуудын асуудлыг хөндөж байгаа болохоос чиний тухай яриагүй. Тийм ойлголт өгсөн бол уучлаарай хэмээн уучлалт гуйсан гэх мэдээлэл байгаа юм.