Дэнж хотойлгон нааддаг дэлхийд ганцхан монгол наадам эхлэхэд ердөө гуравхан хоног үлдээд байна. 11-ний өглөө монголчууд бид хэний хүү төрийн наадамд түрүүлж, хэний морь магнайдаа тоосгүй ирэхийг шинждэг, таадаг, таамгаа уралдуулдаг ард түмэн. Ай даа, монгол наадам ч дөхөж байна даа. Энэ жил нар хур тэгшрээд, дэлхий дэлэгнэж, сайхан зун болж байна. Өнгөрсөн жилийн өдийд хаа сайгүй гантай, хэцүүхэн байлаа.

 

Тэр үеийг бодвол энэ жил ёстой л нэг зун болж байна. Нар, хур ээлжлээд, өвс ногоо ч сайн ургаж, наадмаа хий гэсэн шиг л байгаа. Ийм сайхан зунаар сайхан наадахгүй бол өөр яах билээ. Харин энэ жил наадмаар айхтар ширүүн бороо орох талаар цаг уурчид мэдээлээд байгаа. Мөн үе үе халуун нар шарах сураг байсан. Тэгэхээр наадамчин олон маань шүхрээ сайн бэлтгэж явах хэрэгтэй болох нь. Борооноос ч, нарнаас ч сайтар хамгаалах томхон шиг шүхэр хэрэгтэй болов уу. Түүнээс бусдаар бол бүх юм сайхан болно. 

 

Наадмын нээлтийг урьд жилүүдийнхээс өвөрмөц, өөр болох болов уу гэж харж байгаа. Анх удаа энэ жил наадмын сүлд дуу нээлтийн ёслол дээр эгшиглэхээр болоод байна. Эх орны тухай олон дуучин дуулахад зориулсан дуу хийдгээрээ алдартай Ш.Гүрбазар, Х.Балхжав хоёр гавьяат наадмын тухай сайхан дуу зохиосон байна билээ. Дээрээс нь УДЭТ-ын найруулагч Б.Наранбаатар энэ жил наадмын нээлтийн тоглолтыг найруулж байгаа. Энэ хүнээс үзэгчид дандаа л шинэ, шинэлэг, өөр зүйлийг хүлээж байдаг. Үзэгчдийн хүлээлтэд хүрэх байх.  

 

Ер нь сүүлийн жилүүдэд наадмаар үзэж харах зүйл ихтэй болоод байгаа. Мэдээж бөхийн барилдаан, хурдан морины уралдаан, сур харваанаас гадна шүү дээ. Хотын удирдлагууд “Найрсаг Улаанбаатар” хөтөлбөрийг хэрэгжүүлж эхэлснээс хойш жуулчид болоод Монголын иргэдэд зориулсан олон соёлын үйл ажиллагааг зохион байгуулж байгаа. Энэ жил “Монгол хуушуур-2016” фестиваль болдгоороо болно. Хамгийн сайхан хуушуур хийж байгаа хүмүүсийг хооронд нь уралдуулах юм билээ. Мөн наадамчин олонд зориулсан АХА тэмцээнээс гадна олон сонирхолтой үйл ажиллагаа болохоор байсан. Энэ мэтээр үзэгчдэд үзэх зүйл их бий.

 

Хүй долоон худагт ч гэсэн иргэд ая тухтай наадах бүхий л боломжоор хангаж өгч байгаа. Хэдхэн жилийн өмнө бужигнасан тоосон дунд наадамладаг байсан цаг ард хоцорсон. Энэ жил Хүй долоон худаг руу рэйлбус явна. Улмаар рэйлбуснаас буусан наадамчдыг автобусаар үнэгүй зөөх юм билээ. Энэ мэтээр жил ирэх тусам наадам сайхан болсоор л байна.

 

Яахав, жилийн жилд гардаг ганц нэг хэцүүхэн асуудлууд дахиад л давтагдлаа. Наадмын тасалбарыг тулгаж зардгаас болоод уртаас урт дараалал үүсдэг. Энэ жил ч гэсэн усан борооноор иргэд наадмын тасалбар авах гээд л дараалалд зогслоо. Цаашлаад наадмын өдөр шагийн тасалбарын үнэ хэд ч хүрэхийг хэн мэдлээ. Нэг иймэрхүү асуудлыг дараа дараачийн жилээс зохицуулмаар байгаа юм. Үүнээс өөр өөлөөд байх юм алга. Энэ жил түрүүлсэн бөхөд цоо шинэ Ланд-200 автомашин өгөхөөр болоод байгаа. Хэн гэдэг хүчтэн нь наадамдаа түрүүлж, цолоо нэмж, 1024 бөхийн магнайд гарч, цоо шинэ төмөр хүлгээр шагнуулахыг ердөө дөрөвхөн хоногийн дараа бид харна. Энэ жилийн наадам ч сайхан болно доо.

 

Дэлхий дэлэгнэж, дэнж ногоорч, дэлгэр Монголын дээлтэй монголчуудын сэтгэл тэнэгэр байна. Эртэй баяртай бөхчүүдээ биширч, эрэмгий хурдан хүлгийнхээ хөлснөөс адис авдаг, эрхий мэргэн харваачдын уухайн дуунд хөглөгддөг миний ард түмэн сайхан наадарай.