Манай улсад 3D технологи нэвтрээд хараахан 10 жил болоогүй байна. Дэлхий нийтэд ч мэдээллийн технологи өндөр хөгжиж буй билээ, энэ цаг үед. Одоо олонх нь хоёр хэмжээст ертөнцөөс татгалзаж, 3D цаашилвал 4D, 5D… гэх мэт технологи руу хошуурч байна. Манай улсын үзэгчдийн хувьд ч 4D технологиор кино үзэх тийм ч шинэ сонин содон зүйл биш. Гэхдээ бүрэн хэмжээний уран сайхны киног 4D форматаар үзнэ гэдэг тийм ч амар зүйл биш юм.

Тэгвэл нэг сайхан мэдээ дуулгахад, тун удахгүй монголчууд 4D форматын давтагдашгүй шинэ мэдрэмжийг мэдэрч, 2-3 цагийн турш кинон дотроо орж үсэрч, харайж, өндрөөс унаж, цэцэгсийг үнэрлэж, цас, бороонд норж, өтгөн манан дундуур явах нь.

Энэхүү гайхамшиг “Оюуны ундраа” группийн бүтээн босгосон “Зайсан хилл” цогцолборт болох нь. Тэнд орчин үеийн технологийн гайхамшгийг мэдрүүлэх 4DX форматын кинотеатр нээгдэх юм байна. Тус кинотеатрын суудлууд бүгд үнэр гаргаж, найман зүгт хөдөлж танд бодит мэдрэмж, таашаал мэдрүүлэх аж.