УИХ-ын гишүүн Д.Гантулгад хүчиндүүлсэн гэх 25 настай Н-ын эгч Ч.Саранзаяа өнөөдөр дахин хэвлэлийнхэнд хандлаа. Учир нь өмнөх удаад хэвлэлийнхэнд хандсан боловч Д.Гантулга гишүүн уучлал гуйж, буруугаа хүлээн зөвшөөрөх нь битгий хэл түүний болоод дүүгийнх нь нэрийг олонд зарлаж, өрөөл бусдаар гүтгэсэн, биеэ үнэлэгч байсан мэтээр яриулж байгаа учраас баримт нотолгооны зах зухаас дэлгэхээс өөр аргагүй болсон байна.

Тэрбээр “Эхний удаад нүүр царайгаа нуугаад, хэвлэлийнхэнд хандсан. Гэтэл миний зургийг сошиалаар тараагаад, Сарангэрэл гэдэг эмэгтэйтэй холбоод байгаа учраас яах аргагүй ил гарч байна. Өөр арга алга. Нийгэмд ийм муухай байдлаар харагдаж байгаадаа уучлал хүсэж байна. Гэр бүл, найз нөхөд, нутаг усныхнаасаа уучлал хүсье. Би энэ хэргийг анхнаасаа хэвлэлээр биш хуулиар шийднэ гэсэн бодолтой байсан.

Гэтэл хэвлэлд хандаагүй байж байтал эргээд хүний нэр төрд халдсан хэрэгт орох бүхий л зүйлийг тэд зохион байгуулчихсан байна. Энэ бол яах аргагүй сонгуулийн үеэр болсон гэмт хэрэг. Түүнээс хойш бид хоёрын хажууд хэн ч байгаагүй. Хоёулахнаа л байсан.  Миний цүнхэн дотор хангалттай баримтууд байгаа. Би бүгдийг нь та бүхэнд өгнө. Хүмүүс бидэнд эргэлзээд байх шиг байна. Шүүх эмнэлэгтээ хандахгүй яасан юм бэ гээд.

Шүүх эмнэлэгт хандсан бичиг нь өдөр судартай байгаа. Цагдаагийнх нь явуулсан шинжээч томилж өгөх, шүүх эмнэлэгт төлбөрөө төлөөд үзүүлсэн тухай баримт бүгд байна. Харамсалтай нь шүүх эмнэлэгт байсан бүхий л баримт бичгийг устгачихсан. Манай дүүгээс арчдас, цусны шинжилгээ авсан.

Гэр хүрч ирээд цагаан хэрэглэл, дүүгийн өмсч байсан дотуур өмдийг аваад явсан. Гэтэл бүгдийг нь устгасан. Би бас энэ хугацаанд зүгээр суугаагүй. Тодорхой хэмжээнд хэрэг яаж байгааг судалж байсан. Шүүх эмнэлгийн эхний дүгнэлтээр эр бэлгийн эс илэрсэн гэж гарсныг би сонссон. Гэтэл эцэстээ шинжилгээний хариу бидний эсрэг гарсан. Ямар ч бэлгийн хавьтал байгаагүй, болоогүй гэж гарсан гэсэн үг.

Тэгээд Баянзүрх дүүргийн прокурор хэргийг хэрэгсэхгүй болгосон. Би өнөөдөр дахиж Баянзүрх дүүргийн прокурорт хандана. Дахиад энэ хэргийг сөхөөд, ажиллаач гэж шаардана. Ер нь бол тэд энэ байдлаараа манай дүүгийн зураг хөргийг гаргаж тавих юм байна л даа. Өнөөдөр манай аав, ах маань хотод ирчихсэн байгаа. Ээж маань гэртээ даралт нь 240 хүрээд сууж байна. Ийм нөхцөл байдалд хүргэхгүй гэсэндээ би сонгуулийн хугацаанд ил гаргаагүй.  Дүүтэйгээ ярилцаад, сонгууль нь өнгөртөл чимээгүй байя. Арай ч энэ хэргийг нуун дарагдуулаад өнгөрөхгүй байлгүй. Хоёулаа сонгуулиар энэ асуудлыг ярьвал хоёр намын дунд хавчигдуулагдаад, хүмүүст гүтгүүлээд, доромжлуулаад дуусна гээд өнгөрөөсөн. Гэтэл өнөөдөр бүх баримтыг устгаад, эргээд биднийг гутаан доромжилж байна.

Би шуудхан хэлье, Гантулга тохиръё гэсэн. Сонгууль дуустал энэ хэргээ хойш нь тавьчихаач гэсэн. Би итгэсэн. Үнэнээ хэлье, би энэ хэргийг тохиролцоод дарчихъя гэж болдсон. Гэр бүл, найз нөхөд, нэр төрөө бодож, тийм шийдвэр гаргасан. Гэтэл өнөөдөр бүх баримтыг устгаад, буцаагаад хүний нэр төрд халдсан хэрэгт холбох гээд байж байна. Одоо надад айгаад байх юм алга. Би хамт олонгүй болчихлоо, найзууд маань бүгдээрээ надаас урвачихлаа.

Өнөөдөр өглөө гэхэд манай дүүгийн оюутны ангийн найз Ану гэдэг охиноор элдэв юм яриулж байна. Би сайн танина, хэцүү амьдралтай. Хүүхэд нь төрөлхийн зүрхний гажигтай ийм л охин. Гэтэл нэг хэсэг найз нөхөд гэж явж байсан  хүнийхээ талаар элдэв юм яриад зогсч байна. Тэрийг хэн хийлгэж байгаа юм. Гантулга аа, болиоч. Яагаад мөрөөрөө амьдрах гэж ядаж байгаа эмэгтэй хүмүүсийг хооронд талцуулаад, алалцуулаад байгаа юм. Тэр охин одоо хүн гүтгэсэн хэргээр явна шүү дээ. Яагаад ил гарч ирээд энэ талаараа мэдэгдэл хийж чадахгүй байгаа юм бэ. Үнэхээр хүчингийн хэрэг хийгээгүй юм бол мэдэгдээч дээ.

Гантулгыг дагаад олон хүн ажилгүй, амьдралгүй болох дээрээ тулчихаад байна. Баянзүрх дүүргийн цагдаад байсан эд мөрийн баримтыг устгасан. Дээрээс нь шүүх эмнэлэг. Мөн Баянзүрх дүүргийн прокурор. Түүнээс гадна над руу дайрч, гүтгэж байгаа найзууд нь бүгд хэрэгт унах аюултай болсон. Надад 8 ширхэг флаш байгаа. Үүнд баримт нотолгоо бий. Би зургадугаар сарын 11-ний шөнө хүүхдээ сахиад хоносон.  12-ны өглөө Гантулга “Гурван гал” эмнэлэг дээр ирсэн. Ирсэн хоёр машин нь дугаартайгаа, дотроос нь миний дүү гарч ирж байгаа гурван ширхэг фото зураг байгаа.

“Гурван гал” эмнэлгийн 303 тоот тасагт би хүүхдээ хараад хоносон. Цагдаа нар үнэхээр ажлаа хийгээд явах юм бол бүртгэлийг нь шалгахад ч болно. Миний хүүхэд хэвтэж байсан бүртгэл бий. Тэр эмнэлэгт Гантулгын найз Анхбаяр хоёрын ярьсан яриа надад бий. Зураг нь хальт гарсан дүрс бичлэг байгаа. Тэрийг би дэлгэнэ.  Би эцсээ хүртэл явна. Монголын шүүх эмнэлэгт тогтоож чаддаггүй юм бол чаддаг газар руу нь явна.

Цагдаа, хуулийнхан надаас ч мэдүүлэг аваагүй байж хэргийг хэрэгсэхгүй болгосон. Ядаж миний найз гээд байгаа Ц-гээс гэрчийн мэдүүлэг авах ёстой биз дээ. Гэтэл нэг ч мэдүүлэг аваагүй. Баянмонгол хорооллын бүх камерын бичлэгийг утсгасан. “Гурван гал” эмнэлэгийнхийг ч гэсэн. Би камерын бичлэгийг авах гээд очиход устгачихсан байсан. Одоо манай найз Ц хэрэг үйлдсэн хүмүүсийн талд орчихсон, намайг доромжлоод л явж байна.

“Гурван гал” эмнэлэгт байхад Гантулга найз Анхбаяртайгаа ирсэн гэж би түрүүнд хэлсэн. Тэр хоёр ирээд, уучлаарай гээд ширээн дээр мөнгө тавьчихаад явсан. 20 сая төгрөг өгсөн. Мөнгөө эргүүлж аваа гэж утсаар хэлсэн. Ирж аваагүй. Түүнээс хойш ерөөсөө холбогдоогүй, утсаа ч аваагүй. Ингэж явсаар хэргийг хаалгачихлаа. Миний өнөөдөр дэлгэж байгаа бичлэг дөнгөж эхлэл нь. Цаана нь маш олон баримт байгаа. Тэр баримтуудыг дэлгэхэд цагдаагийн байгууллага, дээрээс нь баримтыг устгасан маш олон хүн чирэгдэнэ.

Би шууд бүх баримтаа дэлгээд гаргачихмааргүй байна. Тэр хүмүүст боломж олгож байгаа юм. Тэд амьдрал авч явах гэж, дээрээс нь тушаал биелүүлж яваа байх гэж бодож байна. Тэд алдаагаа засаад, уучлал гуйгаад, үнэнээ хэлэх боломжийг нь үлдээж байгаа. Тэгж чадахгүй бол өчнөөн баримт байгаагаа дэлгэнэ. Гантулгыг дагаад олон хүн ноцтой хэрэгтэн болно шүү гэдгийг хэлмээр байна” хэмээн хэллээ.