“Жи тайм”  сүлжээний хэргийн гэм буруугийн шүүх хуралдаан  өнгөрсөн баасан гаригт болж, шүүгдэгч Э.Оюунчимэгийг зохиомол байдал зориуд бий болгож бодит байдлыг нуух замаар бусдыг төөрөгдөлд оруулж, өмчлөгчийн эд хөрөнгийг шилжүүлэн авч их хэмжээний хохирол учруулсан гэмт хэрэгт хамжигчаар оролцсон гэм буруутайд тооцож таван жилийн хорих ялыг нээлттэй хорих ангид эдлүүлэхээр шийдвэрлэжээ. “Жи тайм корпорейшн” компани нь 11398 иргэнд 25 тэрбум 801 сая 303 мянга 770 төгрөгийн хохирол учруулсан.  Энэ хэрэг нь 586 хавтастай 11 мянга 398 хохирогчтой тул шүүх хуралдааны танхимд хохирогчдыг бүрэн оролцуулах боломжгүй байсан юм. Нийслэлийн прокурорын газраас 2015 оны Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2 дахь заалтад заасан /Залилах / гэмт хэрэгт яллах дүгнэлт үйлдэж ирүүлсэн шүүгдэгч Э.Оюунчимэгт холбогдох эрүүгийн хэргийг Баянгол дүүргийн эрүүгийн хэргийн анхан шатны шүүх энэ оны тавдугаар сарын 13-ны өдөр хүлээн авсан. Шүүх хуралдааныг энэ сарын 8-ны өдөр товлосон ч шүүгдэгчийн өмгөөлөгчдийн хүсэлтээр 17-ныг хүртэл хойшлуулсан юм.