Өнгөрсөн жилээс эхлэн жил бүр уламжлал болгон зохион байгуулагдахаар болсон “Color Event UB” будагтай гүйлтийн өдөрлөг маргааш Үндэсний цэцэрлэгт хүрээлэнд 16:00 цагаас болох гэж байна.  Энэхүү өдөрлөгт оролцогчид  3 км замыг 600 метр тутам өөр өөр өнгөөр будуулан гүйж, барианд орох ёстой юм.

Өдөрлөгийн тасалбарт “the Color Event UB” лого бүхий футболк, нүд хамгаалах зориулалтаар нүдний шил, ууттай будаг, уух зүйл үнэгүй дагалдах аж.  Будаг нь хүний биед ямар нэгэн хор нөлөөгүй мэргэжлийн хяналтын газраар баталгаажсан, хүнсний гаралтай будаг аж.  Харин чихэндээ будаг оруулахаас сэргийлэх үүднээс оролцохыг хүссэн хүмүүс  чих бөглөх хөвөнтэй очих ёстой юм байна.

Зөвхөн будгаар будуулан гүйхээс гадна гүйлтийн дараа after party болох бөгөөд өнгөлөг болсон дээрээ хамтлаг дуучдын дууг сонсон, Dj нарын цоглог хэмнэлд бүжиглэн амралтын өдрөө жинхэнэ утгаар нь хөгжилдөн өнгөрүүлэх боломжтой аж. After party дээр ямар ч төрлийн согтууруулах ундааны зүйл зарахгүй тул 10 настай хүүхэдтэйгээ ч бүжиглэж болох аж. Өдөрлөгт  Дуучин Цоожоо /Моханик хамтлаг/,  Magnolian,  Aim4R болон Ninja’s in Black бүжгийн хамтлаг, DJ Enkoolion,  Eamar нар оролцох юм байна.