Гамшгийн үеийн эрэн хайх, аврах болон эмнэлгийн яаралтай тусламжинд зориулан тоноглогдсон гурван нисдэг тэргийг Монгол Улс Францын засгийн газрын гэрээгээр авч, УОК-т хүлээлгэн өгсөн билээ. Энэхүү нисдэг тэргийг агаарын ажиллагаанд гаргахаар тохиргоо хийн бэлтгэл хангаж байна. Гал, усны гамшиг ослын үед тусгай үүрэг гүйцэтгэх зориулалтын 6-8 хүний багтаамжтай энэ нисдэг тэргийг хадгалах гарааш буюу ангарыг барьж, ашиглалтад оруулснаа өчигдөр Шадар сайд С.Амарсайханд танилцуулжээ. Энэхүү нисдэг тэрэг нь нэг удаагийн цэнэглэлтээр 500 км орчим нисэх ба манай нисгэгчид Франц улсад сурч байгаа аж.