Монгол Улсаас гадаад орон руу зорчсон хоёр иргэнээс омикрон халдвар илэрч, тус улсад тусгаарлагдаад байгаа гэх мэдээлэл гарсан. Энэ талаар Эрүүл мэндийн сайд С.Энхболдоос тодрууллаа. Тэрбээр "Эрсдэлтэй байж болзошгүй 100 гаруй сорьцыг Япон руу явуулж шинжлүүлэхэд сэжигтэй 16 тохиолдол илэрсэн. Эдгээрээс арван иргэний сорьцод урьдчилсан байдлаар омикрон илэрсэн.

Гэхдээ эцсийн хариу хараахан гараагүй. Баталгаажуулах шинжилгээ гарсны дараа албан ёсоор мэдээлнэ. Омикрон хувилбар орж ирэх нь цаг хугацааны асуудал. Тиймээс бид аль болох хөл хорио тогтоохгүй байхыг хичээж байгаа.

Дээрх хоёр тохиолдлын хувьд нэг нь арванхоёрдугаар сарын 20-ны нислэгээр Лондон очсон иргэн байгаа. Шууд Монголоос очоогүй транзит хийсэн тул замдаа халдвар авсан уу үгүй юу гэдгийг тогтоох боломжгүй. Солонгост очсон иргэний тухайд тэнд оршин суудаг. Тусгаарлалтад байх хугацаанд нь илэрсэн. Онгоцны буудлаас халдвар аваад тусгаарлалтад орсон уу гэдгийг мөн тогтоох боломжгүй" гэлээ.