Коронавирусийн шинэ хувилбар болох омикрон халдвар манай улсад албан ёсоор бүртгэгдээгүй байгаа бөгөөд дээрх вирусийг шинжлэн тогтоох ажил судалгааны шатанд явж буй. Тэгвэл өчигдөр буюу 2022 оны нэгдүгээр сарын 5-ны өдөр Монгол Улсаас гадаад улс руу зорчсон хоёр иргэнээс омикроны халдвар илэрч, тус улсад тусгаарлагдаад байгаа гэх мэдээлэл гарсан. Энэ талаар Эрүүл мэндийн сайдын зөвлөх О.Батбаяраас тодрууллаа. Тэрээр " Омикрон хувилбар өнөөдрийн байдлаар манай улсад албан ёсоор бүртгэгдээгүй. Гадаадад зорчсон хоёр иргэнээс омикрон илэрсэн гэх мэдээлэл худал. Бидэнд Гаалийн ерөнхий газраас албан ёсоор мэдээлэл ирүүлдэг. Одоогоор тийм мэдээлэл ирээгүй байгаа учир олон нийтийн мэдээллийн хэрэгслээр худал мэдээлэл түгээхгүй байхыг хүсье" гэлээ.