Чингэлэг тээврийн эдийн засагт үзүүлж буй сөрөг үр дагаврын талаар “Тээвэрчдийн нэгдсэн зөв­­лөл”-өөс мэдээлэл өглөө. Тээвэрчдийн төлөөлөл "Замын-Үүдийн боомттой холбоотой асуудалд сумын иргэд, Дорноговь аймаг өртөж байна. Тухайн үед гаргасан шийдвэр бүрийг тээвэрчид ягштал биелүүлж байсан. Тээвэрчдийн хувьд зохион байгуулалт дээр бүх шатанд хамтарч ажилласан. Гэвч одоо тээвэрчид төр, засгийн явуулж байгаа үйл ажиллагаанд оролцож чадахгүй байна. Тээвэрчид хямд үнийн саналаар Засгийн газартай гэрээ хийсэн. Сүүлдээ тээвэрчдийг шунахайн сэдэлтэй гэж үзээд одоогийн зохион байгуулалтаас хассан. Замын-Үүдэд 5359 машин Хятад руу гарах гээд дугаарлаж буй. Үүний 1428 нь аж ахуйн нэгж дээр, 321 нь ББСБ-д, 3328 нь иргэд дээр бүртгэлтэй байна. 1000 гаруй нь компанийн нэр дээр бүртгэлтэй. Гэвч муу нэрийг Замын-Үүдийн жолооч нар үүрдэг Үүнийг бид цаанаасаа захиалгатай гэж үзэж байгаа. Нэг бүлэглэл гарч ирээд тээврийн асуудлыг шийддэг, хил гааль хаагддаг шалтгаан нь энэ хүмүүсийн буруутай үйл ажиллагаанаас болсон. Энэ бүлэглэл хүчтэй байна.

Замын-Үүд орчимд амьдардаг иргэд зорчигч тээврээр амьжиргаагаа залгуулдаг. Үүнийг төр булаагаад авчихаар иргэд, бизнес эрхлэгчдийн амьдрал хүндэрч байна. Хоёр жил гаруй хөл хорионд байсан иргэд төлбөрийн чадваргүй болж эхэлсэн. Чингэлэг тээврийн үйл ажиллагаа нь жолооч, тээвэрчдийн орлогыг булаах оролдлого. Өдөрт гурван компанийн 50 машинаар чингэлэг тээвэрлэж Замын-Үүд дэх иргэдийн ажлын байрыг булааж байна. 

Найм хоногт 300 задгай машинаар зөөчих ачааг чингэлэг тээвэр нэрээр 21 хоногт 50 машинаар зөөсөн. Энэ мэтчилэн иргэдийн цаг зав, мөнгийг дэмий үрж байна. Нэг чингэлэг ачаа нь задгай тэвшинд тал ачаа л болно. Тэг цэгээс ложистикийн төв рүү зөөх ажлыг Хятадын гурван компани хийж буй. Нэг чингэлэг ачаа 70 м.куб болно. Нэг м.куб нь 1500 юаниар явж байна. Ингэхээр нэг чингэлэг ачаа нийт 150 мянган юань буюу 47.2 сая төгрөг болно. Ингэж Хятад руу иргэдийн мөнгө урсаж байна. Чингэлэг тээвэр явж эхэлснээс хойш 2782 чингэлэг Монгол руу татан авсан гэсэн. Ингээд тооцохоор Хятад улс руу 44 хоногт 93 тэрбум төгрөг гарлаа. Үүнийг анхааралдаа аваач ээ. Задгай тээврээ үргэлжлүүлэх шаардлагыг Засгийн газарт хүргүүлнэ" гэлээ.