Сүмо бөхийн Харү башё буюу гуравдугаар сарын тэмцээний хоёр дахь өдрийн барилдаан өчигдөр боллоо.

Сүмод идэвхтэй барилдаж буй цорын ганц ёкозүна Терүнофүжи Г.Ган-Эрдэнэ өчигдөр маэгаширагийн 1-ээс барилдаж байгаа Даэйшотой барилдаж өвдөг шорооджээ. Улмаар нэг даваа нэг унаатай болсон бол өнөөдрийн түүний өрсөлдөгч маэгаширагийн 1-ээс барилдах Уратай барилдана.

Харин комүсүби Хошорюү С.Бямбасүрэн өчигдөр нутгийн бөх маэгаширагийн 4-өөс барилдах Кирибаяама Б.Лхагвасүрэнтэй барилдаж өвдөг шорооджээ. Улмаар Хошорюү хоёр унаатай байгаа бол Кирибаяама хоёр даваатайгаар башёг үргэлжлүүлж байна. Өнөөдөр Хошорюү озеки Такакейшотой барилдах бол Кирибаяама секиваки Абитэй барилдана.

Маэгаширагийн 2-оос барилдаж байгаа Ичиножо А.Ичинноров озеки Такакейшотой барилдаж давсан бол Тамаваши Б.Мөнх-Оргил секиваки Абид өвдөг шорооджээ. Өнөөдөр Ичиножо озеки Шодайтай барилдах бол Тамаваши комүсүби Таканашотой барилдана.

Харү башёд Монголын зургаан бөх барилдана. Үүнд:

• Ёкозүна Терүнофүжи Г.Ган-Эрдэнэ 1-1
• Комүсүби Хошорюү С.Бямбасүрэн 0-2
• Маэгашира 2 Ичиножо А.Ичинноров 1-1
• Маэгашира 2 Тамаваши Б.Мөнх-Оргил 0-2
• Маэгашира 4 Кирибаяама Б.Лхагвасүрэн 2-0
• Маэгашира 8 Чиёошома Г.Мөнхсайхан 2-0