Ирэх сарын 1-нд буюу энэ баасан гаригт Орхон аймагт “Дахин төлөвлөн барилгажуулах дэд бүтэцжүүлэх төслүүд” улсын анхдугаар зөвлөгөөнийг Барилга хот байгуулалтын яам, Орхон аймгийн ЗДТГ хамтран зохион байгуулах гэж байна. Уг зөвлөгөөний талаар аймгийн Засаг даргын орлогч М.Түмэнжэргал болон Орхон аймгийн ерөнхий архитектор, ХББЗА-ОНӨААТҮГ-ын захирал Ц.Баяржаргал нар мэдээлэл хийлээ. ХББЗА-ОНӨААТҮГ-ын захирал Ц.Баяржаргал “Зөвлөгөөнд төрийн захиргааны болон төсөл хэрэгжүүлэх 60 гаруй байгууллагын 300 гаруй төлөөлөл оролцоно. Өөрөөр хэлбэл, төрийн бодлого шийдвэрийг гаргадаг албан тушаалтнууд, түүнийг зохион байгуулж хэрэгжүүлдэг АНН-ийн төлөөлөл оролцож байгаагаараа онцлог юм.

Орхон аймгийн иргэдэд нээлттэй байх үүднээс цахим, танхим хосолсон хэлбэрээр зохион байгуулахаар бэлтгэл ажлыг хангаж байна” гэлээ. Зөвлөгөөнөөр хот суурин газрыг дахин төлөвлөн барилгажуулах төслүүдийг хэрэгжүүлж буй өнөөгийн байдал, тулгарч буй бэрхшээл, цаашид авах арга хэмжээ, орлогод нийцсэн орон сууц төслүүдийг хэрэгжүүлж буй өнөөгийн байдал, тулгарч буй бэрхшээл, цаашид авах арга хэмжээ зэрэг асуудлыг хэлэлцэх юм. Хот суурин газрыг дахин хөгжүүлэх хуулийн хүрээнд хэрэгжиж буй төслүүдийг хэрэгжүүлж буй яам, агентлаг, нийслэлийн Засаг даргын хэрэгжүүлэгч агентлагууд, орон нутгийн өмчит үйлдвэрийн газрууд болон төсөл хэрэгжүүлэх аж ахуй нэгж байгууллагууд харилцан санал солилцох, мэдээлэл авах, санамж бичиг байгуулж хамтран ажиллах нь тус зөвлөгөөний зорилго юм.

Зөвлөгөөнд Барилга хот байгуулалтын яам, Газар зохион байгуулалт геодези, зураг зүйн гаар, Нийслэлийн Засаг даргын хэрэгжүүлэгч агентлагууд, Нийслэлийн орон сууцны корпораци ОНӨААТҮГ, Дахин төлөвлөлт хэрэгжүүлж буй аймгуудын төлөөлөл, Орхон аймгийн төрийн байгууллагууд, иргэдийн төлөөлөл оролцоно. Дахин хөгжүүлэх, орон сууцжуулах бодлогыг Орхон аймаг гурван чиглэлээр хэрэгжүүлж буй. Нэгдүгээрт, Хот дахин хөгжүүлэх хуулийн хүрээнд гурван байршилд хотыг дахин хөгжүүлэх ажлыг хэрэгжүүлж байгаа юм. Тодруулбал, Цагаанчулуут багийн 49-53 дугаар гудманд гэр хорооллыг дахин төлөвлөн, барилгажуулах төслийг хэрэгжүүлхээр аймгийн ИТХ-ын тогтоол гарч, өнөөдрийн байдлаар хэсэгчилсэн ерөнхий төлөвлөгөөг боловсруулах ажлыг зохион байгуулж байна.

Уурхайчин багийн Тамир зочид буудлын урд талбайд 1,3 га, Говил багт 22,9 га газарт тус тус дахин хөгжүүлэх ажлыг зохион байгуулж байна. Говил багт ашиглалтын шаардлага хангахгүй 24 байрыг буулгах бол Уурхайчин багт ашиглалт, хот төлөвлөлтийн шаардлага хангахгүй 118 грашийг буулгаж төлөвлөлт хийх юм. Хоёрдугаарт, сул чөлөөтэй байгаа газарт орон сууц барихаар төлөвлөж буй. Үүний хүрээнд 7 байршилд 3784 айлын орон сууц барих ерөнхий төлөвлөгөөг гаргасан. Гуравдугаарт, гэр хорооллын газраа өмчлөөд авсан айл өрхүүдийг тухайн газар дээрээ орон сууц барин амьдрах боломжоор хангах ажил хоёр жилийн өмнөөс хэрэгжсэн бөгөөд үүнд 8 баг хамрагдах юм.