“Дахин төлөвлөн барилгажуулах дэд бүтэцжүүлэх төслүүд” улсын анхдугаар зөвлөгөөн Орхон аймагт эхэлсэн. Орхон аймгийн Засаг дарга С.Батжаргал зөвлөгөөнийг нээж үг хэлэв. Тэрээр, “Хот суурийн газрын хөгжил дэвшил нь хүн амьдрах таатай нөхцөл бүхий аюулгүй орчин, байгаль экологийн ээлтэй технологийг бий болгож, ирээдүй хойч үеийнхээ төлөө бүтээж буй сайн үйлс билээ. Эрдэнэт хот нь үүсэн байгуулагдаад 46 жил болж байна.

Иймээс бидэнд иргэдийн эрүүл, аюулгүй, таатай орчинд амьдрах эрхийг хангах зорилгоор хот, суурин газрыг дахин хөгжүүлэх үйл ажиллагааны хүрээнд хот, суурин газрын барилгажсан хэсэг, нийтийн эдэлбэрийн газрыг дахин төлөвлөн байгуулах, ашиглалтын шаардлага хангахгүй барилга байгууламжийг буулган шинээр барих, гэр хорооллын газрыг дахин зохион байгуулах, дахин төлөвлөн барилгажуулах ажлыг эхлүүлээд байна. Дэлхийн хөгжлийн чиг хандлага, Улсын Их хурлын 2020 оны 52 тогтоолоор батлагдсан “Алсын хараа 2050”, түүний хэрэгжилтийг хангах Монгол Улсыг 2021-2025 онд хөгжүүлэх таван жилийн үндсэн чиглэл, Орхон аймгийг хөгжүүлэх таван жилийн үндсэн чиглэл, Улсын Их хурлын 2021 оны 106 тогтоолоор батлагдсан “Шинэ сэргэлтийн бодлого”-ын “Хот, хөдөөгийн сэргэлт” бодлоготой нийцүүлэн хот, суурин газрыг байгуулах, хөгжүүлэхэд газрын доорх ертөнц буюу инженерийн цогц шийдэл бүхий дэд бүтцийн шугам сүлжээг бий болгох, түүнийг зүй зохистой ашиглах, өргөжин хөгжүүлэх нь чухал билээ.

Энэ утгаараа хөгжлийн ерөнхий төлөвлөгөө боловсруулах ажилд энэ бүхнийг оруулсан болно. Өнгөрсөн жилүүдэд бид хотынхоо Дулааны цахилгаан станцыг өргөтгөх, эрчим хүчний хангамжаа нэмэгдүүлэх, үерийн далан байгууламжийг шийдвэрлэх чиглэлээр олон улсын төслүүдтэй хамтран ажиллаж инженерийн шугам сүлжээ барьж байгуулсан нь хотын хөгжлийн ирээдүйн чиг хандлагын хувьд дахин төлөвлөлт хийх, орон сууцны барилга баригдах бүтээн байгуулалтыг үргэлжлүүлэн хийх суурь нөхцөлийг бүрдүүлсэн гэж үзэж байна. Хот, суурин газрыг дахин хөгжүүлэх тухай хууль батлагдаж, нийслэлийн төвлөрлийг сааруулах, гэр хорооллын дахин төлөвлөлт, орон сууц болон орлогод нийцсэн ногоон орон сууцны хүртээмжийг нэмэгдүүлэхээр хийгдсэн ажлууд нь бидэнд бас туршлага болно гэж үзэж байна” гэлээ.

Үүний дараа БХБЯ-ны Дэд сайд Э.Золбоо “Цаг үеэ олсон зөвлөгөөнийг зохион байгуулж байгаад талархаж байна. Хүн амын 40 орчим хувь нь стандартын шаардлага хангасан тохилог тухтай орон сууцанд амьдарч байгаа бол үлдсэн 60 хувь нь ариутгал татуурга болон дулааны шугамд холбогдоогүй нөхцөлд амьдарч байна. Бидний үндсэн зорилго 60 хувьд хамрагдаж байгаа иргэдийн аятай тохьтой амьдрах орчинг нь бүрдүүлэх юм. Гэр хорооллыг дахин төлөвлөх ажил 2013 онд Улаанбаатар хотод анх эхэлж байсан бол өнөөдөр аймгуудад хэрэгжиж эхэлсэн нь сайшаалтай.

Нийслэл хотод анх 24 байршил 75 талбайд "100 мянган орон сууц" барих ажлыг эхлүүлж байв. Бид өөрсдийн эдийн засгийн боломжоо тооцож чадалгүй бүгдийг нэг дор эхлүүлсэн нь алдаа болсон. Үүний үр дүнд аж ахуйн нэгжүүд алдагдалд орж, төслүүд гацаж, зогсож эхэлсэн. Угтаа бол өөрсдийн нөөц бололцоог тооцож, жишиг болохуйц төслүүдийг эхлүүлж шат дараатай хэрэгжүүлэх ёстой байсан. "100 мянган айлын орон сууц"-ны төслийн хэрэгжилтээр 13 мянган айл өрх орон сууцанд хамрагдсан байна. Дахин төлөвлөлтийг хэрэгжүүлэх зургаан хэлбэр байдгийн гэр хорооллыг дахин төлөвлөх нь хамгийн чухал юм. Учир нь, иргэдийн ая тухтай амьдрах орчин бүрдэхээс гадна эрүүл мэнд, нийгэм, боловсролын асуудал дагаад шийдэгдэж байдаг. Тиймээс бид өнөөдөр алдаа оноогоо хэлэлцэж, бие биенээсээ суралцах ёстой” гэлээ. Зөвлөгөөн хэлэлцүүлгээр үргэлжилж байна.