Засаг дарга С.Батжаргал уламжлал ёсоор  Шанд багийн Ерөнхий боловсролын  17 дугаар сургуулийн хичээлийн шинэ жилийн нээлтэд оролцож, мэндчилгээ дэвшүүллээ. 

Мөн Монгол Улсын Ерөнхийлөгчийн  зарлиг Эзэн Богд Чингис хааны эш хөргийг хүндэтгэн залах тухай зарлигийг сонордуулж, тус сургуулийн хичээлийн хоёрдугаар байранд эш хөргийг залав. 

Боловсролын салбарын төсвийн шинэчлэлийг хэрэгжүүлэх, багш нарын ачааллыг бууруулж, ёс зүйг дээшлүүлэх, хүүхдийн нийгэм, сэтгэл зүй, танин мэдэхүйн хөгжлийг дэмжих, боловсрол эзэмшихэд тулгарч буй бэрхшээлийг арилгаж, сурах тэгш боломж бүрдүүлэх зэрэг томоохон зорилго, зорилтуудыг дэвшүүлсэн  онцлогтой жил хэмээн Засаг дарга С.Батжаргал  2022-2023 оны хичээлийн шинэ жилийг онцолсон. 

Орхон аймагт энэ хичээлийн жилд  төрийн болон хувийн хэвшлийн 40 цэцэрлэг  1200 багш,  ажилтантайгаар үйл ажиллагаа явуулах бөгөөд  төрийн өмчийн цэцэрлэгт 8200 гаруй хүүхэд хамрагдав.  Харин   ерөнхий боловсролын  25 сургуульд 22000 гаруй сурагч суралцахаас нэгдүгээр ангид 2600 гаруй сурагч элсэн орлоо.  

2022 онд аймгийн боловсролын салбарт улсын төсвөөс 8,2 тэрбум, орон нутгийн төсвөөс 3,6 тэрбум, нийт 11,8 тэрбум төгрөгийн хөрөнгө оруулалтыг хийж, сүүлийн хоёр жилд  гурван цэцэрлэгийн өргөтгөл, шинээр  хоёр цэцэрлэг, нэг  сургуулийн дотуур байр, нэг  сургуулийн өргөтгөл ашиглалтад орсон. 

Мөн гуравдугаар сургуулийн барилгыг буулгаж 960 хүүхдийн суудалтай сургууль шинээр барих, 8 дугаар сургуулийн 320 хүүхдийн суудалтай өргөтгөлийг барих, Цагаанчулуут багт 150 хүүхдийн цэцэрлэгийн барилга барих зэрэг томоохон бүтээн байгуулалтын ажлуудыг улс болон орон нутгийн төсвийн хөрөнгө оруулалтаар эхлүүлээд байгаа юм. 

Нийт сурагч,  сурган хүмүүжүүлэгч багш нар Та бүхэндээ хичээлийн шинэ жилийн мэнд дэвшүүлье.