Шатахуун түгээх станцуудын нүхэн жорлонгоо  эко жорлон болгосон эсэхэд шалгалт хийж шаардлагатай арга хэмжээг авч ажиллахыг өнгөрсөн долоо хоногийн даваа гаригийн шуурхай зөвлөгөөнөөр Засаг дарга С.Батжаргал холбогдох байгууллагуудад  үүрэг болгосон.   Аймгийн хэмжээнд 9 аж ахуйн нэгжийн 23 шатахуун түгээх станцууд үйл ажиллагаа явуулдаг.  

Байгаль орчин, аялал жуулчлалын яамны албан даалгавар, аймгийн Засаг даргын Шуурхай хурлаас өгсөн үүрэг даалгаврын дагуу  холбогдох байгууллагууд газар дээр нь ажиллаж зургаан  аж ахуйн нэгжийн 12 нүхэн жорлонг бүртгэлжүүлсэн байна.  Мөн  гурван  аж ахуйн нэгжийн  нүхэн жорлонг бүрэн даруулж, эко ариун цэврийн байгууламжтай болгосон байна.  Ирэх арав, арваннэгдүгээр сард гурван аж ахуйн нэгж эко жорлонтой болох талаар мэдээллээ. 

Тухайлбал, 

• “Тэс петролиум” ХХК-ийн Вокзалд байрлалтай шатахуун түгээх станцын нүхэн жорлонг дарж, булшилж, эко ариун цэврийн байгууламжтай болгов
• Жаргалант сум болон Булган аймаг явах замд байрлалтай шатахуун түгээх станцуудын нүхэн жорлонг аравдугаар сард багтаан эко болгох тухайгаа мэдэгдсэн.
• “Магнай трейд” ХХК-ийн гурван нүхэн жорлонг арвандүгээр сарын 15-ны дотор эко ариун цэврийн байгууламжаар өөрчлөх тухайгаа мэдэгдсэн.
• “Ганга зайвар” ХХК-ийн шатахуун түгээх станцыг “Дашваанжил” ХХК худалдаж авсан бөгөөд аравдугаар сард багтаан эко ариун цэврийн байгууламжтай болгох тухайгаа мэдэгдсэн.
• “Сод Монгол групп” ХХК-ийн Наран баг “Хорооллын эцэс”, Дэнж багт байрладаг шатахуун түгээх станцыг бохир ус татан зайлуулах төвлөрсөн шугамд холбогдох хүсэлтийг 2021 онд “Эрдэнэт ус, дулаан түгээх сүлжээ” ОНӨХК-т хүргүүлж хариу шийдвэрийг хүлээж байгаа. 
• Баянцагаан баг (Гурван замын пост) шатахуун түгээх станцын нүхэн жорлонг 2023 оны төсөвт суулгаж солих тухай албан бичгийг ирүүлсэн байна.