Монголын СОС хүүхдийн хотходын гэр бүлийн үйлчилгээний байрны өргөтгөлийн шав тавих ёслол есдүгээр сарын  9-нд боллоо. Энэхүү арга хэмжээнд Монголын СОС хүүхдийн хотходын үндэсний нийгэмлэгийн удирдлагууд, ХБНГУ-ын Херманн Гмайнерийн сангийн Удирдах зөвлөлийн дарга болон гишүүд, мөн Олон улсын Европын бүс дэх СОС хүүхдийн хотходын төлөөлөгч нар, Нийслэлийн Иргэдийн хурал, Баянзүрх дүүргийн удирдлагууд оролцсон байна.  

Херманн Гмайнерийн сангийн Удирдах зөвлөлийн дарга ноён Вилтфрейд Вислоцил, удирдах зөвлөлийн гишүүн ноён Гералд Маулер нар  хэлэхдээ, боломж хүн бүрт нээлттэй байдаг гээд, хүүхдүүдэд  илүү боломжийг нээж өгөхөд шинээр баригдах өргөтгөл чухал гэдгийг тэмдэглэлээ. Мөн Нийслэлийн Иргэдийн төлөөлөгчдийн хурлын дарга Ж.Батбаясгалан мэндчилгээ ирүүлсэн байна.

Баянзүрх дүүргийн Засаг дарга Н.Баярмөнх шав тавих ёслолд оролцож үг хэлэхдээ, тус дүүрэг Монголын СОС хүүхдийн байгууллагатай 2007 оноос хойш хамтарч ажилласаар ирсэн гээд Монголын СОС хүүхдийн байгууллага хүүхэд багачуудын авьяас чадварыг нээх, нийгмийн хөгжилд бодитой хувь нэмэр оруулж, мэдлэг боловсролтой ирээдүйг бий болгох үүднээс барилгын өргөтгөл хийж  байгаа ийм гэгээн сайхан арга хэмжээнд дүүргийн Засаг даргын хувиар оролцож байгаадаа баяртай байгаагаа илэрхийллээ.

Монголын СОС хүүхдийн хотходын гэр бүлийн үйлчилгээ нь эхлээд 20 жил болж байгаа аж. Өнөөдрийн байдлаар тус байгууллагаас хэрэгжүүлж буй “Гэр бүл дэмжих” хөтөлбөрт 500 хүүхэд, 645 өрхийн 2047 хүүхэд, 1035 асран халамжлагчид хандаж халамжийн төрөлжсөн үйлчилгээ авсан байна.