Энэ жил Өвөрхангай аймгийн хэмжээнд зуншлага оройтож, нийт нутгийн 50 гаруй хувь нь гандуу байсны зэрэгцээ намар эрт хүйтэрсэн. Иймд мал аж ахуйн салбар дахь өвөлжилт, хаваржилтын бэлтгэл ажлыг сайтар хангах шаардлагатай байна. Одоогоор манай аймгаас 10 гаруй сумын 700-аад малчин өрх 400 мянга орчим малтайгаар бусад аймгуудад отор нүүдэл хийх төлөвтэй байгаа. Тиймээс өнөөдөр Дундговь аймгийн Засаг дарга Ц.Мөнхбаттай биечлэн уулзаж, тус аймгийн нутаг дэвсгэрт Өвөрхангай аймгаас оторлож очих малчдыг бүх боломжоороо дэмжин ажиллах хүсэлтийг тавилаа. Дундговь аймгийн удирдлагаас бидний хүсэлтийг хүлээн авч, отроор яваа малчдад төрийн үйлчилгээг хүргэх, өвөлжөө, хаваржаа, уст цэгээр хангах талаар анхаарч ажиллахаа илэрхийлэн хамтран ажиллах санамж бичгийг байгуулаад байна.