Монгол Улсын Их Хурлын дарга Г.Занданшатар Өмнөд Солонгосын нийслэл Сөүл хотын Итэвон дүүрэгт болсон эмгэнэлт ослоор 151 хүн амь үрэгдэж, олон хүн гэмтэж бэртсэнд эмгэнэл илэрхийллээ. Тэрбээр "Монгол Улсынхаа нэрийн өмнөөс болон хувиасаа БНСУ-ын ард түмэнд, нас барсан хүмүүсийн ар гэрийнхэнд гүн эмгэнэл илэрхийлж байна. Энэ үед гэмтэж эмнэлэгт хүргэгдсэн олон хүмүүсийг хурдан эдгэрэхийг хүсч байна. Энэхүү эмгэнэлт цаг үед Монгол Улс БНСУ-тай хамт байх болно" гэжээ.

Өмнөд Солонгосын Ерөнхийлөгч Юн Сук Ёл өнөөдрийг гашуудлын өдөр болгон зарласан. Ослын дараа дэлхийн улс орнуудын удирдагч нар эмгэнэл илэрхийлж, Өмнөд Солонгосын ард түмний уй гашууг хуваалцаж байна. Тухайлбал, АНУ-ын Ерөнхийлөгч Жо Байден тэргүүн хатагтай Жилл нар хайртай хүмүүсээ алдсан гэр бүлүүдэд гүн эмгэнэл илэрхийлжээ. Тус эмгэнэлд БНСУ-ын ард түмэнтэй хамт эмгэнэн гашуудаж буйгаа илэрхийлээд, гэмтсэн хүмүүсийг хурдан эдгэхийг ерөөсөн байна. Мөн хоёр орны нөхөрлөлт харилцаа, ард түмний холбоо хэзээ хэзээнийхээс илүү бат бөх гэдгийг онцолжээ.