МСБХ-ны Үндэсний Дээд лигийн 2022/23 оны улирлын эрэгтэй лигийн плэйоффын дөрөв дахь өдрийн буюу ням гарагийн сүүлийн тоглолт Завхан Бродерс болон М Гарьд багуудын цувралын хоёр дахь тоглолт маш өрсөлдөөнтэй болж 103-100 харьцаатай өндөрлөлөө. Завхан Бродерс баг өнөөдөр хожил авснаар цувралын харьцаа 1-1 болж тэнцэж байна.

Тоглолтын баатар: Улирлын хоёр дахь тоглолтдоо оролцсон Завхан Бродерс багийн легионер тоглогч Фредерик Лиш 35 оноо, 6 холын зайн шидэлт амжилттай гүйцэтгэж багаа хожилд хөтөллөө.

Мөн Энхбатын Дөлгөөн 25 оноо, 15 самбар авч дабл дабл гүйцэтгэжээ. Түүний 15 самбарын 7 нь довтолгооны самбар байлаа.

X Factor: Завхан Бродерс багийн төвийн тоглогч Даймонд Стөүн ханиадны улмаас өнөөдрийн тоглолтыг өнжснөөр сэлгээний төвийн тоглогч Зургаанжингийн Энх-Учрал 11 минут тоглож 6 оноо, 3 самбар авч 100 хувьтай довтоллоо.

Тоглолтын эргэлтийн цэг: М Гарьд баг тоглолтыг сайн эхлүүлж 9-4 харьцаатай тэргүүлж байхад Завхан Бродерс баг 10-0 run хийж тоглолтын хэмнэлийг эргүүлж чадсан билээ. Тоглолт 4 үеийн турш ойролцоо онооны зөрүүтэй өрнөсөн бөгөөд хамгийн олон онооны зөрүү үүссэн нь 11 байлаа. Тоглолтын төсгөлд Фредерик Лиш багтаа хэрэгтэй оноонуудыг авч сүүлийн 6 минутад 12 оноо авсан байна.

Статистик худлаа хэлдэггүй: Өнөөдрийн тоглолтод Завхан Бродерс баг 35 минутын турш онооны илүү явсан бол М Гарьд баг 4 минут онооны илүү явжээ.