УИХ-ын гишүүн Б.Энхбаяр 2023 оны гуравдугаар сарын 13-17-ны өдрүүдэд болох Хөгжлийн банкны эх үүсвэрээс арилжааны банкаар дамжуулан олгосон төсөл, хөтөлбөрийн зээлийн ашиглалт, зарцуулалт, үр дүн /2542 төсөл/, Хөгжлийн банкны бусдаас татан төвлөрүүлсэн хөрөнгийн удирдлага, үр дүнгийн талаар нотлох баримтыг шинжлэн судлах сонсголын талаар мэдээлэл хийлээ. Тэрээр "УИХ-ын хяналт шалгалтын хуульд заасны дагуу сонсголоос 7 хоногийн өмнө олон нийтэд мэдээлэл өгөх үүрэгтэй. Энэ үүргийн дагуу 3 дахь удаагийн сонсголын талаар та бүхэнд мэдээлэл хүргэе.  УИХ-ын түр хорооноос Хөгжлийн банктай холбоотой нотлох баримтыг хянан шалгах нээлттэй сонсголуудыг хоёрдугаар сард зохион байгуулсан. 3 дахь удаагийн буюу төгсгөлийн нотлох баримтыг шинжлэн судлах сонсгол энэ сарын 13-17 ны өдрүүдэд болно. Энэ удаагийн сонсголоор хоёр үндсэн асуудлыг хэлэлцэнэ. Нэгдүгээрт, арилжааны банкнуудаар дамжуулан олгосон Хөгжлийн банкны эх үүсвэртэй 2542 зээлийн асуудлыг ярина. Энэ зээл нь нийт 1.6 их наяд төгрөгийн үнийн дүнтэй юм.  Хоёрдугаарт,  2011-2020 он хүртэлх хугацаанд арилжааны банкнуудад Хөгжлийн банкны эх үүсвэрээс байршуулсан нийт 3280 ширхэг мөнгөн хадгаламжийн хэлцэлд дүн шинжилгээ хийсэн. Тус банкны Мөнгөн удирдлагын асуудлыг ярина гэсэн үг. 3280 хадгаламжийг байршуулсан болон буцаан татсан асуудлыг багцалж хэлэлцэх юм.  

3 дахь удаагийн нээлттэй нотлох баримтыг шинжлэн судлах сонсголын хүрээнд нийт 210 албан тушаалтныг гэрчээр дуудна. Үүнд Монгол Улсын Ерөнхийлөгч асан Ц.Элбэгдорж, Х.Баттулга, Сангийн сайдаар ажиллаж байсан С.Баярцогт, Ч.Хүрэлбаатар, М-Си-Эс групын үүсгэн байгуулагч Ж.Оджаргал, Таван богд трейд групын үүсгэн байгуулагч Ц.Баатарсайхан, Буян компанийн үүсгэн байгуулагч Б.Жаргалсайхан, УИХ-ын гишүүн асан Ж.Батзандан, Л.Эрдэнэчимэг, УИХ-ын гишүүн О.Цогтгэрэл, гэсэн нийт 210 хүнийг гэрчээр дуудна" гэв.

Хянан шалгагч, шинжээчтэй холбоотой сэтгүүлчийн асуусан асуултад ийн хариуллаа. 

Нийт хоёр хянан шалгагч, долоон шинжээч ажиллаж байна. Хоёр хянан шалгагч таван шинжээчийн бүрэлдэхүүнтэйгээр 1-2 дахь удаагийн хяналт шалгалтын ажлыг хийсэн. Энэ удаагийн шалгалт цар хүрээ өргөн олон мянган зээлдэгчтэй холбоотой асуудал яригдаж байгаа учир долоон шинжээч ажиллуулахаар төлөвлөсөн. Эхний сонсгол эхлэхээс өмнө хоёр шинжээчийг өөрчилсөн. Учир нь улс төрийн нөлөө бүхий этгээдүүдтэй хамаарал бүхий байсан юм. Шинжээчийн дүгнэлтийг хүрээнд нотлох баримтыг шинжлэн судлах ажил явж байгаа. Мөн гэрчүүдийг дуудах асуудал ч гэсэн шинжээч нарын гаргаж ирүүлсэн тодруулах шаардлагатай гэж үзсэн дүгнэлтийн хүрээнд явж байна.