Умард  Солонгосын удирдагч Ким Жон Ун, ОХУ-ын Ерөнхийлөгч Владимар Путин нарыг  ажлаа хийж байгаа мөртөө хэвлэлээр хэд хоног  гарахгүй болохоор олон улсад бөөн эрэл сурал болж элдэв таамаг дэвшүүлсэн мэдээлэл хөвөрдөг.  Тэд  манай УИХ-ын зарим гишүүний хэлдгээр “Ажлаа тултал”  хийж байсныг  өнөөдөр дэлхий дахинд өрнөж буй үйл явдал, ил гарч ирснийх нь дараах мэдээллүүд гээд олон зүйлээс харж болно. 

Харин манай Улаанбаатар хотын Засаг дарга Д.Сумъяабазарыг  хэвлэлээр харагдалгүй удлаа гэхээс илүүтэй  ажлаа хийгээч ээ хэмээн иргэд “эрэн сурвалжилж”  байна.  

Түүнийг олны нүдэнд ил байсан ч далд байсан ч ажлаа хийхгүй, Монгол Улсын хүн амын 60 гаруй хувь нь оршин сууж буй хотыг удирдаж  чадахгүй байгаад бухимдаж байгаа юм. 

Ил гарч ирээд танилцуулсан шийдвэрүүд нь элдэв асуудал дагуулж иргэдийн уур унтууг хүргээд хэлсэн үг нь цахим сүлжээгээр  “од болоод гялалздаг”  талтай. Ийм учраас  олны хэл амнаас зугтааж энд тэнд “бүгчихсэн” юм байх даа гэцгээж байна.  

Хотын дарга маань хамгийн сүүлд  Цагаан сарын өмнөхөн БНХАУ-ын Бээжин, Тяньжин, Чунчин хотод албан томилолтоор ажиллаж, танилцсан. Тэгээд  “Улаанбаатар руу ирэх ачаа тээврийн эргэлтийг нэмэгдүүлнэ” гэж хэлээд таг чиг, алга болсон билээ. Үүнээс хойш олон нийтийн сүлжээгээр түүнийг амралтын газар байна гэсэн сураг гараад алдарсан. Түүнийг тэгтлээ санаж бэтгэрсэндээ иргэд  эрэл хайгуул хийгээгүй. 

Аз  жаргалтай, Соёлтой хотын маань  уран гулгуурын талбайн цас, мөс ханзарч дороос нь хог цухуйж шороо тоос босож ирлээ. Сүүлийн үед цахим сүлжээгээр энд тэнд уул овоо мэт болсон хогтой гэр хорооллын гудамж, орон сууцны хорооллын халгиж цалгисан хогийн цэгийн зургууд тархаж байна. Ялангуяа хамгийн олон хүн амтай Сонгинохайрхан, Баянзүрх дүүрэгт хог цэвэрлэх, ачих асуудал хуримтлагдаж буй гэнэ. Хотын дарга Д.Сумъяабазарын УИХ-д гишүүнээр сонгогдож байсан Сонгинохайрхан дүүргийн гэр хороололд сард нэг удаа л хог ачиж байгаа аж. Ялангуяа Тахилт орчимд тендерийн асуудлаас болоод хоёр компани  хог  тээвэрлэх, цэвэрлэх ажлаа дундаа хаяад байгаа мэдээлэл бий. 

Галлагааны улирал хулжиж байгаа ч Улаанбаатар хот өнгө алдсан, бүүдгэр саарал хэвээр. Харин хэдэн залуус нийлж Багшийн дээдийн нүхэн гарц, гудамжны сандлыг угааж хотоо өнгө зүстэй болгож байгаа нь бахархууштай. Уг нь хотын дарга, удирдлагууд санаачилга гаргаад өөрсдөө биш юм гэхэд ойролцоох байгууллага, хариуцсан газраар нь угааж цэвэрлүүлж байх ёстой биз дээ. Гэтэл бүр таг шүү. 

Нөгөө талаар хэдэн арван тэрбум төгрөгөөр автомашинд чип суулгаж иргэдээ хянана, явсан км-ээр тооцож татвар авна гээд ажил хийж буйгаа илэрхийлж буй хотын удирдлагууд ичмээр. Үүнээс өөр хийх ажил Улаанбаатарт үнэндээ алга гэж үү. Хотын дарга аа та амарч дууссан бол “цэргүүдээ” дагуулаад хотын төв болон, гэр хорооллын дундах явган хүний замаар нэг өдөр алхаад үзээрэй. Тэгвэл яг ямар ажил хийхийг чинь тухайн орчин нөхцөлийн дүр төрх шууд хэлээд өгнө. Яг сайхан “хурдаа аваад” алхаж байтал чинь  тав, арван метрийн зайтай, зам голлосон гэрлийн шонгууд  “дүнхийгээд”  гараад, гараад л ирнэ. Эрүүл саруул, залуус нь яах вэ автозам руу ороод тойроод л гарна биз гэж бодъё. Харааны бэрхшээлтэй, тэргэнцэртэй иргэн, таяг тулсан хөгшид, хүүхдүүд  яах билээ. Машинд чип суулгана гэж “маанагтаж” байхаар явган хүний зам голлосон гэрлийн шонгуудаа нүүлгэн шилжүүлээч. Хотын дарга нь ажлаа хийхгүй амралт зугаалаад алга болдог юм байж. Хот  хариуцсан сайд Ж.Сүхбаатар нь бас хаана явна вэ. Улаанбаатар хотод тулгамдсан асуудлыг шийдээд шийдээд явна л гэсэн. Яг хаана юу шийдээд яваа тайлангаа бас нэг тавина байгаа. Хотын асуудлыг хар толгойгоороо хариуцсан хоёр дарга минь  гэгээн дүрээ харуулж гийгүүлсэн ажлаа ярьж өгнө үү. 

Эх сурвалж: Монголын мэдээ сонин
2023 оны гуравдугаар сарын 16. Пүрэв. №042 (5770)