Газар хөдлөлтийн гамшигт нэрвэгдсэн Турк улсад үүрэг гүйцэтгэсэн Монголын эрэн хайх, аврах багийн алба хаагчдын томилолтын мөнгийг олгоогүй байгаа талаар мэдээлэл гарсан. ОБЕГ-ын дарга, хошууч генерал Г.Ариунбуян энэ асуудлаар тайлбар өгчээ.  

Тэрээр “Гамшгаас хамгаалах тухай хуульд “Голомтын бүсэд ажилласан онцгой байдлын байгууллагын алба хаагч болон бусад төрийн цэргийн байгууллагын алба хаагчийн албан томилолтын зардлыг ердийн үеийнхээс гурав дахин нэмэгдүүлж олгоно” гэж заасны дагуу  өдөрт 420 доллар буюу нийтдээ 16 сая 200 мянган төгрөгийг нэг алба хаагчид олгохоор шийдвэрлэсэн. Алба хаагчдын томилолтын мөнгийг олгож эхлээд байна. 36 албан хаагчид нийт 585 сая төгрөг олгоно. 

Хүмүүнлэгийн тусламжаар хүргэгдсэн хүнсний болон бусад төрлийн бараа, тээврийн зардалд тодорхой хэмжээний хэмнэлт гарсан учраас санхүүгийн тохируулга хийх замаар санхүүжилтийн асуудлыг үе шаттай шийдэж байгаа. Үлдсэн санхүүжилтийг ойрын хугацаанд шийдвэрлэж, томилолтын асуудлыг бүрэн дуусгана" гэлээ.