Филиппиний өнгөрсөн зургадугаар сард болсон Ерөнхийлөгчийн сонгуульд өмнө нь Давао хотын захирагчаар ажиллаж байсан “шийтгэгч” хочит Родриго Дютерт сонгогдсон. Түүнийг шийтгэгч гэж нэрлэсэн нь ч учиртай. Тэрбээр хотын даргаар ажиллаж байхдаа гэмт хэрэгтнүүдтэй хатуу тэмцэж байсан тул ийн нэрлэгдэх болсон байдаг.

Улмаар сонгуульд олонхийн санал авч, хотын даргаас улсын Ерөнхийлөгч болсон эрхэм өөрийн “шийтгэх” бодлогоо улам өргөжүүлж, цагдаа нарт гэмт хэрэгтний амийг хороох эрхийг өгч, хар тамхины  бүлэглэлийн эсрэг тэмцэж эхэлсэн.Түүнийг Ерөнхийлөгч болсноос хойш 3000 орчим хүн цагдаагийн гарт эсвэл цаазлуулж амиа алдсан гэсэн мэдээллийг ч зарим эх сурвалж дамжуулж байгаа юм.Тэгвэл ард иргэд нь хэрхэн үнэлж буйг тандах зорилгоор явуулсан олон нийтийн судалгааны дүнг өчигдөр албаны эх сурвалж танилцууллаа. 

Ерөнхийдөө Ерөнхийлөгчийн албан тушаалд томилогдоод гурван сарын нүүрийг аль хэдийнэ үзсэн Родриго Дютертын дэмжигчдийн хувь тасралтгүй өссөн үзүүлэлттэй байгаа юм.  Дээр дурьдсан хар тамхины эсрэг дайныхаа хүрээнд олон хүнийг “цааш нь харуулсан” хэдий ч, иргэд нь эргэлзээгүйгээр түүний үйл хэргийг дэмжиж буй бололтой.  Тус улсын нийслэл Манила хотод төвтэй “Social Weather Stations” гэх байгууллага олон нийтийн судалгааг явуулжээ.

Судалгаа өнгөрсөн сарын 24-27-ны өдрүүдэд болж, насанд хүрсэн 1200 гаруй хүнийг санамсаргүй байдлаар сонгон     хамруулсан байна.  
Тэгвэл судалгаанд оролцогсдын 76 хувь нь  Ерөнхийлөгчийнхөө бодлогыг дэмжиж буйгаа илэрхийлсэн бол 11 хувь нь эсэргүүцсэн сонголтыг дугуйлсан байжээ.Харин үлдсэн хувьд нь “Сайн мэдэхгүй байна” гэж хариулсан аж.