Сүүлийн таван жилийн судалгаагаар улсын хэмжээнд жилд дунджаар 25 мянга гаруй зам тээврийн осол бүртгэгдэж, 500 орчим хүн амь насаа алдсан байна. Өнгөрсөн онд л гэхэд зам тээврийн ослын улмаас  57 хүүхэд эндсэн бөгөөд үүний 51 нь орон нутгийн замд амь насаа алдсан. Үнэхээр аймаар биш гэж үү? Юун коронавирус, цар тахал. Цөөхөн Монголчууд ингэж үй олноороо үхэж байхад яагаад нэг ч дарга, сайд дуугарахгүй, тоохгүй байгаа юм бэ? Хэн ч хариуцлага хүлээхгүй байгаа юм бэ? Төрсөн эхийг өвлийн хүйтнээр шаахайтай гаргасан гээд Засгийн газар бүрэн бүрэлдэхүүнээрээ огцорч байсан үе саяхан биз дээ. Үүгээр жишээ авбал Хууль зүй, дотоод хэргийн сайд Х.Нямбаатар та, мөн ТЦА-ны удирдлагууд ажлаа хийж чадалгүй ганцхан жилийн дотор 50 гаруй хүүхдийн аминд хүрчихлээ гэж бодоод хариуцлагаа хүлээх ёстой бус уу!!! Эсвэл үхэгсдийн өөрсдийнх нь буруу гээд орхиж байгаа юм уу? Мэдээж жолооч буруутай. Тэд өөрсдийнхөө бас гэмгүй мөрөөрөө яваа хэн нэгний амьдралыг сүйрүүлдэг "малнууд". Бүгд тийм биш л дээ дүрэм зөрчдөг зарим жолоочийг хэлэв. Эдний ухаангүй, буруу үйлдлээс болж олон хүн эрэмдэг болж, амь насаа алдаж байна. Үүнийг тэдэнд яаж ойлгуулах вэ? Ингэж торгож, уриа лоозон гаргаж, нөлөөллийн нэртэй, муу ёрын ухуулга явуулаад үр дүнд хүрэхгүй гэдэг нь харагдлаа. Энэ ажлаас чинь хойш олон хүн амь насаа алдаа шүү дээ. Мунхаг жолооч нарт чанга хууль дүрэм л нэгийг бодогдуулна. Үгүй бол ар гэрийнхнээс нь нэг хүн үхэж байж тэд ухамсарлана. Хамаатных нь нэг хүн үхэг гээд салбарын яам, ТЦА хүлээгээд суух уу? Үгүй бол хууль цаазаа чангатга. Хүний алтан амнаас үнэтэй зүйл гэж энэ хорвоод үгүй.

Ташрамд хэлэхэд ТЦА, урьдчилан сэргийлж байна, шалгаж байна гэх нэрийдлээр машины ажиллахгүй байгаа нэг муу гэрэл, дохио, дугаарын хязгаарлалттай машинтай хөөцөлдөж, торгохоо урьтал болгож, ажил хийдгээ болимоор юм. Цаана чинь хүмүүний эрдэнэт амь орон нутгийн замд эрсдээд байна шүү дээ. Тэнд бодлого боловсруулж, та нар тэнд ажиллаж болохгүй юу. Танай албанаас хэдэн хүн томилолтоор, нэмэлтээр орон нутагт ажиллаж байна вэ? Ядаж аялал зугаалгын үеэр суурин газаргүй газарт 100 км тутам пост гаргаж хяналт, шалгалтаа өндөржүүлж болохгүй юм уу? Хэрэгтэй, хэрэггүй баахан самбар гаргаж, зураг зурж байхаар тэр мөнгөө ажилчдадаа өгч орон нутагт томилолтоор ажиллуулбал арай илүү үр дүн гарахгүй гэж үү? "Техник, технологи хөгжиж байна. Суурин газарт камер байрлуулаад тухайн жолооч замд цагт хэдэн км хурдтай явсныг нь дараагийн суурин дээр тогтоодог болно, бид ингэж орон нутгийн замыг хяналтдаа авна" гэж хэлээд хэдэн жилийн нүүр үзлээ.

Техник технологийн хөгжил чинь цагт 80 км цагийн хурдтай дүрмээрээ яваад гүйцэгдэхээ байлаа. Гэтэл манай ТЦА хөдөлдөггүй ээ. Хөдлөхөөрөө 10 км цагийн хурдтайгаар урагшилж, таван жолооч торгож,  төсөв бүрдүүлнэ. Ийм л байгаа шүү дээ яс юман дээр. Нэмж хэлэхэд  чанаргүй, чадваргүй жолооч бэлтгэдэг жолооны курсуудыг цөөлмөөр байна. 2022 оны эхний 9 сарын байдлаар улсын хэмжээд 400 гаруй жолооны курс  сургалт явуулж байна гэсэн судалгаа байдаг. Үүний 154 нь нийт 71 салбартайгаар Улаанбаатарт байдаг бол 175 жолооч бэлтгэх сургалтын байгууллага орон нутагт ажиллаж байна. Эд нар бас л мөнгө харж, ажлаа явуулдаг "өөдгүй гарууд". Тэднээс хариуцлага нэхмээр байгаа юм.  Үүнийг хэлэхийн учир юу вэ гэвэл та нарын үр дүнгүй унхиагүй ажил, мунхаг жолооч нарын хар гайгаас болж олон мянган гэмгүй иргэний амь нас сүйдээд байгаа юм.

Үргэлжлэл бий...

Эх сурвалж: https://www.mnb.mn/i/297349