М.Даваа

Хүмүүс хүүхдийнхээ зургийг сошиал орчинд тавих үзэгдэл сүүлийн үед нэлээд ихэссэн. Яах вэ нэг талаар хүүхдээрээ бахархах, өхөөрдөх байж болох ч нөгөө талаар хүүхдээ эрсдэлд оруулж болзошгүй гэдгийг сайн бодох хэрэгтэй. Мэдээж амьдралын онцгой сайхан мөчөө хүмүүстэй хуваалцах гэсэн таны санааг буруушаахгүй ч, магадгүй та хүүхэддээ эрсдэл дагуулах зүйл хийж байж болох юм.  Хүүхэд хамгааллын тухай хуулийн 8.4-т “Сонин хэвлэл, телевиз, радио, цахим сүлжээ ашиглаж, хүүхдийн хувийн нууцад халдаж, дуу, дуу дүрсний, дүрсний бичвэр, гэрэл зураг тараасан, эсвэл гэмт хэрэг, зөрчил үйлдсэн гэж мэдээлсэн, олны өмнө гутаасан ажилтан, албан тушаалтан, иргэн, хуулийн этгээдэд хуульд заасан хариуцлага хүлээлгэнэ” гэж заасан байдаг. Гэтэл зарим нэг хүмүүс  хүүхдийнхээ зургийг олон нийтийг татах хэрэгсэл болгон ашиглаж  байгаа нь үнэхээр харамсалтай.  Тэр тусмаа технологи өндөр хөгжсөн өнөө үед  гэр бүлдээ, хүүхэддээ тохиолдсон хором бүрийг алдалгүй гэрэл зураг болгон буулгах боломж хүн бүрт бий болсон.

Гэвч  гэрэл зураг  хүнийг сайхан харагдуулахын зэрэгцээ гутааж болдог  гэдгийг цаг ямагт санаж явах нь зөв юм.  Ялангуяа ямар нэгэн шалтгааны улмаас эвгүй байдлаар  авахуулсан зураг интернэтээр цацагдсан тохиолдолд том хүн,  хүүхэд алинд нь ч зовлон авчирч болзошгүй. Энэ үүднээс та  хүүхдийнхээ  ямар зургийг хуваалцаж болох, болохгүй гэдгийг сайтар анхаарах хэрэгтэй байх.  Хүүхдээ өхөөрдсөн хүмүүс нүцгэн зургийг нь нүүр номоороо  хуваалцдаг. Хэдийгээр  энэ нь тухайн үедээ сайхан санаа мэт санагдаж болох ч хүүхдийн тань нүцгэн зураг хүүхэд чинь том болж сургуульд орох үед  мөн  бусдын гарт орсноор таагүй үр дүнд хүргэж болзошгүй. Түүнчлэн өвчтэй хүүхдийнхээ зургийг бусадтай хуваалцах, шийтгүүлж байгаа зураг, уйлж орилж байгаа бичлэг, бие засаж байгаа зураг зэргийг эцэг эхчүүд  хүүхдээ өхөөрдөж байна гэж боддог ч тэр нь гадны хүмүүст таалагдах нь хэр байдгийг бодолцож үздэггүй, ямар л олигтой байв гэж дээ. Үүнээс гадна сүүлийн үед хамгийн их тохиолдож буй асуудал бол хүүхдийн зургаа хаа хамаагүй олон нийтийн сүлжээнд  тавьснаас үүдэлтэй  хувийн мэдээллээ бусдад алдах үзэгдэл юм. Тиймээс  эцэг эхчүүд хүүхдийнхээ мэдээллийг өөрийнхөөсөө илүү хамгаалах нь чухал. Зураг бол хувийн мэдээллийн нэг хэлбэр бөгөөд  зургаар дамжуулан хүүхдийг ямар хүйстэй, хэдэн настай, тэр ч бүү хэл хаана сурдаг, ямар ааш араншинтайг ч таньж мэдэх боломжтой  шүү дээ. Сүүлийн үед үүнээс улбаалан хүүхдүүд гэмт хэрэгт орооцолдох, гэмт хэргийн хохирогч болох, эрүүл мэндээрээ хохирох, болох болохгүй хүмүүст уруу татагдах гээд хүн сонсоход ч хэцүү зүйл ихээр гарах болсон.  Гэвч эцэг эхчүүд бид үүнээс сэргийлэх бүрэн боломжтой. Хүүхдийнхээ зургийг бусадтай хуваалцах нь  зөв үү, буруу юу гэдгийг  ялган салгаад сурчих л хэрэгтэй юм.  Хүүхдийнхээ зургийг олон нийтийн сүлжээнд тавьж болохгүй, хор уршиг учирч болзошгүй гэдгийг мэргэжлийн байгууллага нь бидэнд сануулдаг ч, түүнийг ойшоож, хүлээж авдаг нь тийм ч их биш гэж хэлж болно. Өөрсдийн буруутай, болгоомжгүй үйлдлээс үүдсэн таагүй зүйл таны хүүхдэд насан туршийн сэтгэлийн толбо үлдээнэ гэхээр эрхбиш танд нэг зүйл бодогдох биз ээ.

Эх сурвалж: Монголын мэдээ сонин

2023 оны есдүгээр сарын 06. Лхагва. №140 (5868)