ОХУ-д шатахууны асуудлыг хэлэлцэх уулзалт улирал бүр болдог. Энэ улирлын уулзалтад УУХҮЯ, АМГТГ, Монгол Улсын шатахуун импортлогч аж ахуйн нэгжүүд оролцоод иржээ. Улмаар уулзалтаар хэлэлцсэн асуудал, цаг үеийн нөхцөл байдлын талаар сэтгүүлчдэд мэдээлэл хийлээ. УУХҮЯ-ны Газрын тосны бодлогын газрын дарга Б.Анхбаяр  “ОХУ-ын Роснефть  компанийн зүгээс шатахууны үйлдвэр есдүгээр сард засварт орно гэдэг мэдээллийг зургадугаар сард бидэнд өгсөн. Энэ засвар жил бүр хийгддэг. Бид энэ дагуу манай улсын хэмжээнд   нэг сараас илүү хугацаанд хэрэглэх нөөц  бүрдүүлсэн.

Гэвч ОХУ-ын зүгээс есдүгээр сарын 21-ны өдөр маш гэнэтийн шийдвэр гарсан. Тэд дотоод үнийн өсөлт болон жижиг компаниудын эсрэг хэрэгжүүлж байгаа арга хэмжээнийхээ хүрээнд Монгол гэлтгүй бүх оронд шатахуун нийлүүлж байгаа компаниудад хориг тавьсан. Энэ хүрээнд ОХУ-аас бүтээгдэхүүн авах боломжгүй болсон. Иймд БНХАУ-тай холбогдож, дизель түлш маш яаралтай авах ажлыг эхлүүлсэн.

ОХУ-ын Төрийн Думын дарга В.В.Володин манайд айлчлах үеэрээ Монгол Улсыг энэ хоригоос гаргана гэдгээ мэдэгдсэн. Засгийн газар нь ч ажилласан. Гэхдээ том орон тэр дор нь шийдвэр гаргахгүй. Хуралдаанаараа асуудлыг оруулаад Монгол Улсыг хоригоос гаргах шийдвэр гаргасан. Энэ процесс явагдахад нийт 21 хоног өнгөрсөн. Энэ хооронд бид 7-9 дүгээр сард нөөцөлсөн шатахуунаа хэрэглэсэн. Нөөц одоо бол багассан байна. Бид сая уулзалтаар Монголд хүнд нөхцөл үүсээд байгааг хэлсэн. ОХУ-ын талаас ч хүйтэрч байгаа зэрэг хүндрэлтэй нөхцөл үүсэж байгааг хэлээд, Монгол Улсын шатахууныг тасалдуулахгүй гэдгийг ярьсан хэмээн мэдээллээ.  Иргэдийн дунд “Шатахуун импортлогч аж ахуйн нэгжүүд шатахууны үнийг  нэмэх гэж зохиомол хомстол үүсгэж байна” гэж буй билээ.  Тэгвэл УУХҮЯ-наас  “АИ92 авто бензины үнэ өсөхгүй. Тонн тутамд 705 ам.доллар байхаар “Роснефть” компанитай тогтворжуулалтын гэрээ хийсэн. Үүнийг 2024 онд үргэлжлүүлэхээр тохирсон. Үнэ өсөхөд валютын ханш, гадаадын зах зээл гэсэн хоёр л хүчин зүйл нөлөөлдөг. Үнэ өсөх нөхцөл үүсэхээргүй байгаа” гэж мэдэгдээд байна. 

АМГТГ-ын дарга Л.Баярмандал “Төрийн байгууллагууд болон ААН-үүдийн төлөөлөл ОХУ руу томилолтоор ажиллаж, ирэх оны нэгдүгээр улирлынхаа хангамж, шатахуун нийлүүлэлтийн асуудлыг тохирсон. Энэ оны арванхоёрдугаар сарын 16-20-ны өдрүүдэд нефть импортлогч компаниуд буюу “Петровис”, “Шунхлай”, “Сод Монгол”, “Газ Ойл нефть”, “Тэс Петролиум”, “Монсуль” компанийн гүйцэтгэх удирдлагууд болон УУХҮЯ, АМГТ-ын төлөөлөл ОХУ-д ажиллаад ирлээ.

ОХУ-ын талаас Монгол, Оросын Засгийн газар хоорондын комиссын хуралдааны Оросын хэсгийн дарга, ОХУ-ын Байгалийн баялаг, экологийн сайд  А.А.Козлов, Эрчим хүчний дэд сайд, Оросын төмөр зам хувьцаат нийгэмлэгийн хөдөлгөөн тээвэр хариуцсан орлогч дарга нар болон Роснефть, Газпром зэрэг компаниудын төлөөлөлтэй уулзлаа.

Уулзалтаар тохиролцоонд хүрсэн гол асуудал нь 2024 оны эхний улиралд сар болгон 140 мянган тонн дизель түлш, 90 мянган тонн АИ92 авто бензинийг худалдан авах захиалга өгөөд ОХУ-ын тал үүнийг  бүрэн нийлүүлнэ  гэдгээ мэдэгдсэн. Монгол Улс сар болгон 110 мянган тонн дизель түлш, 55 мянган тонн бензин хэрэглэж байна. Одоогоор нийлүүлэгдэж байгаа хангамжийг илүү сайжруулах, нөөцөө бүрдүүлэх зорилготойгоор нэмэлт захиалгууд өгч баталгаажуулсан” хэмээв.

Дашрамд дурхад Эрчим хүчний сайд Б.Чойжилсүрэн,  ЗТХ-ийн Дэд сайд Л.Халтар нар  ОХУ руу томилолтоор явсан байна. Тэд цахилгаан, шатахууны асуудлаар хэлэлцээр хийх ажээ.