ЭМГЭНЭЛ

Нэрт сурган хүмүүжүүлэгч, олон мянган шавь нарынхаа эрхэм багш Цэндийн Ганбат 2024 оны 3 дугаар сарын 18-ны өдөр хорвоогийн мөнх бусыг үзүүлж, Монголын боловсролын салбарынхан болон гэр бүл, үр хүүхэд, хамаатан садан, найз нөхдийнх нь хувьд нөхөж баршгүй хүнд гарз тохиолоо.

                Ц.Ганбат нь 1953 оны 02 дугаар сарын 16-нд Улаанбаатар хотын Нэгдүгээр төрөх эмнэлэгт Цэндийн тав дахь хүү болон мэндэлжээ.

                Тэрээр 1970 онд Нийслэлийн 10 жилийн 23 дугаар дунд сургуулийг дүүргэж , улмаар УБДС-ийн Түүх-Газар зүйн ангид элсэж, сургуулиа амжилттай төгсгөөд тухайн үеийн Найрамдлын районы 53 дугаар дунд сургуульд сурган хүмүүжүүлэх их үйлсийнхээ эхлэлийг тавьжээ.

                Ц.Ганбат нь багшлах хугацаандаа 10 дугаар ангийг 5 удаа удирдан төгсгөж, шавь нараа эрдэм боловсролтой, эрүүл чийрэг бие бялдартай, хүнлэг энэрэнгүй төлөвшилтэй, үзэл бодолдоо үнэнч, үйл хэрэгтээ эзэн нь байх ирээдүйн иргэд болгон бэлтгэхэд үлэмж хувь нэмрээ оруулсан билээ.

                Төрөлх сургуулийнхаа Түүхийн кабинетыг шинээр байгуулахдаа өөрийн багш доктор Сэр-Оджав, Наваан нарын дэмжлэгээр түүхэн дурсгалт эд өлгийн зүйлсээр  тохижуулж нийслэл болон дүүрэгтээ тэргүүлж байв.

                1977 онд 10 жилийн сургууль болон өргөжихөд кабинетаа мөн л Монголын түүх-Нийгэм судлалын тэргүүн болгожээ.

                Түүнчлэн заах арга зүйн дэвшилтэт аргуудыг сургалт, хүмүүжлийн үйл ажиллагаандаа бүтээлчээр нэвтрүүлж, бүлэг сэдвийн боловсруулалт, хөгжүүлэлтийг тогтмол хийх, сурагчдын мэдлэгийг цаг тухайд нь үнэлж, бие даан ажиллуулахад илүү анхаарснаар сургалтын амжилт чанараар тогтмол ахиж ирсэн.

                Монголын түүх, нийгэм судлалын хичээлүүдээр дамжуулан сурагчдын бүтээлч сэтгэлгээг хөгжүүлж, онолын мэдлэгийг хэрэглээнд суурилан баттагах чадвар эзэмшүүлэхэд анхаарч ажилладаг багш юм.

                Ц.Ганбат нь 53-р дунд сургуульд хичээлийн эрхлэгчээр ажиллаж байгаад 1990 оны 8 сараас захирлаар томилогдон ажилласан.

                Захирал Ц.Ганбат нь “Сургуулийн хөгжлийн гол хөдөлгөгч хүч нь мэргэжлийн өндөр ур чадвар сайтай хөгжсөн багш байна” гэж үзэж багш нарынхаа хувь хүний болон мэргэжлийн ур чадварыг дээшлүүлэхэд нь байнга анхаарч ажиллаж байв.

                Үүний хажуугаар өөрийн мэдлэг боловсролоо дээшлүүлж 1983-1985 онд Марксизм-Ленинизмийн оройн их сургуулийг эдийн засагч мэргэжлээр төгссөн.  Өдөө түүний олон арван шавь нар нь улс орны хөгжлийг түүчээлэгч бүтээн байгуулалтын бүхий л салбарт үр бүтээлтэй ажиллаж байна.  Тэдний дундаас УИХ-ын гишүүн, төр захиргааны удирдах ажилтан, соёл урлаг, шинжлэх ухаан, бизнес, биеийн тамир спортын алдартнууд олноор төрөн гарсан билээ. Түүний хувьд 1990-2001 онд Ерөнхий боловсролын 53 дугаар сургуулийн захирлаар, 2001-2004 онд Ерөнхий боловсролын 21 дүгээр сургуулийн захирлаар, 2004-2007 онд Хан Хэнтий улсын тусгай хамгаалалттай газрын хамгаалалтын захиргаанд хяналт, шалгалт хариуцсан мэргэжилтнээр тус тус ажилласан юм.

                1980 оны Намын Төв Хорооны Улс төрийн товчооны 70-р тогтоолоор ЕБС-ийн 9,10-р ангид үзэх “Хувьсгалын өмнөх үеийн Монголын түүх”-ийн сурах бичиг, шинэчлэн зохиох ажилд  сурах бичгийн зохиогч доктор Хөдөөгийн Пэрлэй, академич Н.Ишжамц, Сурах бичгийн редактор-Шинжлэх ухааны академийн дэд ерөнхийлөгч Ш.Бира, Түүхийн хүрээлэнгийн захирал академич Ш.Нацагдорж нарын хамтаар хэвлэлийн редактораар ажиллажээ.

                Захирал Ц.Ганбат нь мэргэжлийн өндөр боловсролтой, ажлын арвин туршлагатай, хувь хүний үнэт зүйл, төлөвшилтэй, удирдан зохион байгуулах онцгой авьяастай, гагцхүү хүний төлөө гэсэн сэтгэлтэй нэгэн байлаа.

                Түүний боловсролын салбарт зориулсан хөдөлмөр бүтээлийг үнэлж Хөдөлмөрийн гавьяаны улаан тугийн одон, Хөдөлмөрийн хүндэт медаль болон  Ардын Хувьсгалын 90,100 жилийн ойн медалиуд, Ардын боловсролын тэргүүний ажилтан, МХЗЭ-ийн Төв хорооны “Тэргүүний залуу” алтан медаль зэрэг цол тэмдгээр шагнаж байв.

                Эрхэм таны минь эелдэг дөлгөөн дүр, бүтээлч хичээнгүй зан болоод сурган хүмүүжүүлэх шилдэг арга барил, үлгэр жишээ манлайлагч чанар тань биднийхээ сэтгэл зүрхэнд үүрд дурсагдах болно.

Талийгаачийн үр хүүхэд, гэр бүл, найз нөхөд, хамт олноос нь