“Өсвөрийн парламент” хөтөлбөрийг Монгол Улсын Их Хурал, НҮБ-ын Хүүхдийн сан, Засгийн газрын хэрэгжүүлэгч агентлаг Хүүхэд, гэр бүлийн хөгжил, хамгааллын ерөнхий газар,  Монголын Скаутын холбоо хамтран үндэсний хэмжээнд зохион байгуулж байгаа билээ.

Гурав дахь жилдээ болж буй уг хөтөлбөрийн үе үеийн оролцогчид өнөөдөр (2024.05.10) Үндэсний цэцэрлэгт хүрээлэнд “Өсвөрийн парламент” хөтөлбөрийн нэрэмжит төгөл байгуулах үйл ажиллагаанд оролцлоо.

Уг үйл ажиллагаанд Улсын Их Хурлын гишүүн, Тогтвортой хөгжлийн зорилгын дэд хорооны дарга Х.Булгантуяа, НҮБ-ын Хүүхдийн сангийн Монгол дахь Суурин төлөөлөгч Эваристе Коуасси-Комлан, Парламентын судалгаа, сургалтын хүрээлэнгийн захирал Ц.Цогзолмаа, Нийгмийн эрүүл мэндийн үндэсний хүрээлэнгийн захирал С.Өнөрсайхан, “Үндэсний цэцэрлэгт хүрээлэн” ОНӨТҮГ-ын дарга Ү.Оюунзул болон Монголын Скаутын холбоо, “Өсвөрийн парламент” хөтөлбөрийн 2021, 2022, 2023 оны оролцогчид оролцов.

Оролцогчид гурван багт хуваагдаж, модны суулгац суулгах, цэцэг тарих, мод услах ажиллагааг зохион байгууллаа.

Энэхүү хөтөлбөр нь өсвөр үеийнхэнд ардчилал, хүний эрх, эрх чөлөө, хууль тогтоох үйл ажиллагаа, парламентын боловсролын талаар мэдлэг олгох, тогтвортой хөгжлийн зорилго, байгаль орчинд ээлтэй амьдралын хэв маягийг хэвшүүлэх зорилготой.

Энэ зорилгын хүрээнд оролцогчид болон хөтөлбөрийг зохион байгуулагчид Туул голын ундны усны эх үүсвэрийг хамгаалах, ногоон байгууламжийг нэмэгдүүлэх, Монгол Улсын Ерөнхийлөгч У.Хүрэлсүхийн санаачилсан “Тэрбум мод” үндэсний хөдөлгөөнд нэгдэж ийнхүү 100 гаруй модыг Үндэсний цэцэрлэгт хүрээлэнд тарьж, цэцгийн мандлыг байгуулах ажлыг эхлүүллээ.

Төгөл байгуулах санаачилгыг гаргасанд талархал илэрхийлж, “Өсвөрийн парламент” хөтөлбөрийн хамт олонд Үндэсний цэцэрлэгт хүрээлэнгээс “Мод эзэмшигч” батламжийг гардуулан өглөө.

Мөн энэ үеэр НҮБ-ын Хүүхдийн сангаас “Үндэсний цэцэрлэгт хүрээлэн” ОНӨТҮГ-т 100 гаруй багаж, хэрэгслийг хандивласан юм хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.