АТГ-аас шинээр сонгогдсон болон томилогдсон өндөр албан тушаалтнуудын хөрөнгө орлогын мэдүүлгийг дэлгэсэн билээ.  Улмаар парламентын гишүүд хэдий хэрийн хөрөнгөтэй болох нь ил болсон.

Тэгвэл шинээр бүрэлдсэн парламентын гишүүд дотроо хадгаламж дахь хөрөнгө, унасан машин, жилийн орлогоороо Б.Наранхүү гишүүн цойлж, бусдыгаа тэргүүлж байгаа бол эсрэгээр хамгийн “ядарсан” гишүүн нь 30 хүрээгүй залуу төрийн түшээ гэгддэг Д.Гантулга болж таарав.  Түүний жилийн нийт орлого нь 16 сая төгрөг байх бөгөөд тэрбээр өөрийн гэсэн байргүй, хөл дүүжлэх унаагүй, малгүй, газаргүй гэдгээ ХОМ-тээ дурьджээ.  Түүнчлэн, 100 саяар үнэлэгдэх үнэт эдлэлтэй, хадгаламждаа  сая 600 мянган төгрөгтэй гэнэ.

Мөн  аль нэг банкинд тавьсан зээлгүй гэх тэрбээр “Эрдэнэс тавантолгой” ХК-д 3216 ширхэг хувьцаатай гэнэ билээ. УИХ-ын гишүүд хамгийн багадаа нэг байр, дээд тал нь таван орон сууцтай байхад мань хүн л ганцаараа өөрийн гэсэн орох оронгүй болж таарав. Д.Гантулга гишүүний хувьд 1987 онд төрсөн бөгөөд энэ жил 29  насны босго алхсан нэгэн. Хүний амьдрал 30 наснаас эхэлдэг гэдэг хойно, сэтгэл зүтгэл байхад унах унаа, амьдрах байр яамай байна аа.