PUBG Mobile-ын дэлхийн аварга шалгаруулах тэмцээн буюу 3 сая ам.долларын шагналын сантай "PUBG Mobile Global Championship 2024" тэмцээний финалын шат Британийн Лондон хотод болно.

Тэмцээний хэсгийн шат өндөрлөж, финалын сүүлчийн эрхүүдийг олгох "Last Chance" шатны тоглолтууд өнгөрсөн долоо хоногт болсон. Зургаан багт финалын эрх олгох тус шатнаас Монголын "Falcons Force" баг эрхээ авсан ч "Stalwart Esports", "4Merical Vibes" багууд эрхээ авч чадаагүй юм.

Тэгвэл "Ногоон" хэсгийг тэргүүлж финалын эрх аваад байсан Оросын "Brute Force" багийн тоглогчдын Британийн виз гараагүй тул тэмцээнд оролцох боломжгүй болжээ. Улмаар Last Chance шатанд 7-р байр эзлээд байсан Монголын 4Merical Vibes баг финалд оролцохоор болсон байна.

Энэ талаар PUBG Mobile Esports-оос албан ёсоор мэдэгдсэн бөгөөд удалгүй 4Merical Vibes албан ёсны хуудсаараа мөн мэдээлсэн юм.

Ийнхүү дэлхийн шилдэг 16 баг хүч үзэх дэлхийн аваргын финалд Монголын хоёр баг өрсөлдөхөөр болов. Финалын тоглолтууд 12-р сарын 6-ны 19:00 цагаас эхэлнэ.