Электрон тоглоомын Counter strike-2-ын хамгийн том тэмцээн болох "Perfect World Shanghai Major 2024" тэмцээн болж байна. 1,250,000 ам.долларын шагналын сантай тэмцээний аваргын төлөөх тоглолт өнөөдөр 17:00 цагт болно.

Тус тоглолтод Европын төлөөлөл "Faze Clan" болон Оросын "Team Spirit" багууд шалгарсан билээ. "Faze Clan" эхний шатанд Team Vitality дараагийн тоглолтод дэлхийн номер нэг "G2 Esports" хожиж аваргын төлөө шалгарсан бол "Team Spirit" багийнхан эхний шатанд "Team Liquid" дараагийн шатанд MOUZ багийг хожсоноор шалгарч үлдсэн байна.

Ази-Номхон далайн бүсийн цор ганц төлөөлөл Монголын "The MongolZ" баг плэй-оффын эхний тоглолтоо дэлхийн шилдэг "MOUZ" багтай хийж 2-0 (Ancient 14-16, Nuke 9-13) харьцаагаар хожигдож манай баг 45 мянган ам.долларын шагналтайгаар нутаг буцлаа.

Азиудын хүрч чадаагүй оргилд гарсан монгол залуус Хятадын Шанхай хотын "Shanghai Oriental Sports Center"-т 18 мянган үзэгчийн дэмжлэг дор тэмцээнээ өндөрлүүллээ. Энэ олон үзэгчийн өмнө тоглож үзээгүй монгол залуус сандралтай байсан нь гарцаагүй, харин ESL Pro League-ийн аварга MOUZ-ын хувьд том тайзны туршлагатай баг нь байв.

Хоёр баг энэ тэмцээний "Elimination Stage" шатанд таарахад The MongolZ Mirage-д 16-12 харьцаагаар нэмэлт үед хожсон. Харин түүнээс өмнө "IEM Cologne 2023" тэмцээний Play-in шатанд таарахад MOUZ Nuke-д 19-22 харьцаагаар мөн нэмэлт үед хожиж байв.

Манай баг эхний шат болох "Opening Stage"-д гурван тоглолт хийсэн бөгөөд эхний тоглолтоо Хятадын Rare Atom багтай хийж 13-2 /Anubis/ харьцаагаар дараагийн тоглолтоо Бразилийн MIBR багтай хийж 13-6 /Ancient/, сүүлийн тоглолтоо Европын төлөөлөл "GamerLegion" багийг 2-0 (Mirage 13-5, Anubis 13-2) харьцаагаар хожсон.

Дараагийн шат болох "Elimination Stage"-д мөн гурван тоглолт хийсэн бөгөөд дэлхийн чансааг тэргүүлэгч "G2 Esports"-той эхний тоглолтоо хийж Inferno-д 13-10 харьцаагаар хожиж, улмаар дараагийн тоглолтоо дэлхийн шилдэг "MOUZ"-ыг Mirage-д 16-13 харьцаагаар нэмэлт үед хожлоо. Улмаар хэсгийн гурав дахь тоглолтоо Данийн "HEROIC" багийг 2-1 (Mirage 8-13, Anubis 19-17, Ancient 13-6) харьцаагаар хожлоо.

Дэлхийн шилдэг 24 баг гурван шат дамжин тоглох энэхүү электрон спортын оргил тэмцээний эхний буюу "Opening Stage" шатны тоглолтууд швейцар системээр болсон билээ. Хамгийн түрүүлж гурав хожсон найман баг хоёр дахь буюу "Elimination Stage" шатанд шалгарч, Европын урьдчилсан шатнаас шууд эрхээ авсан найман багтай нийт 16 баг оролцож байна. Тэднээс хамгийн түрүүнд гурав хожсон найман баг плэй-оффт шалгарах бол гурав хожигдсон найман баг тэмцээнийг орхино.