Монгол Улсын анхны Ерөнхийлөгч, Бүгд Найрамдах Монгол Ард Улсын Ардын Их Хурлын Тэргүүлэгчдийн дарга, “Чингис хаан” тэргүүн зэргийн одонт, төр, нийгмийн нэрт зүтгэлтэн Пунсалмаагийн Очирбат таалал төгссөн.

Иймд Ерөнхийлөгч Ухнаагийн Хүрэлсүх орон даяар гашуудал зарлах зарлиг гаргасан билээ. Зарлигийн дагуу өнөөдөр 07.00 цагаас 2025 оны 01 дүгээр сарын 25-ны өдрийн 00.00 цаг хүртэлх хугацаанд орон даяар Төрийн далбааг 45 хэмээр бөхийлгөх буюу Төрийн далбааны ишний гуравны хоёрт хүртэл буулгана.

Мөн олон нийтийг хамарсан, урлаг соёлын үзвэр үйлчилгээ зэргийг хориглосон юм. Талийгаачийг сүүлчийн замд нь үдэх оршуулгын комиссыг ЗГХЭГ-ын дарга Н.Учрал ахлан ажилласан.

П.Очирбат агсныг эцсийн замд нь үдэх, салах ёс хийх ажиллагаа Төрийн ордны Их танхимд болно. Салах ёс хийх ажиллагаанд гэр бүл, төрөл садан, төрийн гурван өндөрлөг, УИХ, ЗГ-ын гишүүд, нийгэм улс төрийн зүтгэлтнүүд оролцоно.

Уг үйл ажиллагаа өглөө 6:40 цагаас 3-р эмнэлгээс эхлэх бөгөөд хүндэтгэлийн цуваа 7 цаг 20 минутад Төв шуудангийн замд ирснээр МҮОНРТВ-ийн шууд дамжуулалт эхэлж, 9:40 минутад Төрийн ордноос үдсэнээр өндөрлөнө. Салах ёс гүйцэтгэх, хүндэтгэл үзүүлэн үдэн гаргах арга хэмжээг зөвхөн МҮОНРТВ шууд дамжуулах юм.