Дэлхийн шилдэг 16 баг оролцдог электрон тоглоомын CS2-ын 400,000 ам.долларын (1.38 тэрбум төгрөг) шагналын сантай "BLAST Open Spring 2025" тэмцээн өнөөдөр буюу гуравдугаар сарын 19-нөөс эхэлсэн билээ.

"S-Tier" буюу CS2-ын хамгийн өндөр зэрэглэлийн тэмцээнд анх удаа тоглож буй The Huns Esports тэмцээний А хэсэгт орж эхний тоглолтоо Оросын "Team Spirit" багтай анх удаа учраа таарч 0-2 (Anubis 8-13, Dust II 4-13) харьцаагаар хожигдсон юм. Улмаар доод хүснэгт рүү унаж өчигдөр /2025.03.21/ Европын холбооны "Team Falcons" багтай 0-2 (Inferno 13-16, Ancient 6-13) харьцаагаар хожигдож тэмцээнээ өндөрлүүллээ. Манай залуус ийнхүү тэмцээнээ 13-16-р байраар дуусгаж $5,000 (17.3 сая төгрөг) шагнал авлаа.

Харин шууд урилгаар тоглохоор болсон "The MongolZ" баг B хэсэгт багтсан бөгөөд эхний тоглолтоо Хойд Америкийн "M80" багтай өнгөрсөн шөнө тоглож 2-1 (Dust II 13-11, Ancient 11-13, Inferno 13-3) харьцаагаар хожлоо. Харин тэд шигшээ тоглолтын эрхийн төлөөх дараагийн өрсөлдөгч нь хэдэн хоногийн өмнө "ESL Pro League S21" тэмцээний хагас шигшээд тоглосон The MongolZ хожиж байсан Украйны Natus Vincere багтай өнөөдөр шөнө буюу гуравдугаар сарын 22-23-д шилжих шөнө 01:30 цагаас хийнэ. 

Аваргын төлөөх тоглолтоос бусад бүх тоглолт Bo3 журмаар болох ба хэсэг тус бүрээс гурван баг шигшээ шатанд шалгарна.

The MongolZ багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Бямбасүрэнгийн Гарьдмагнай /bLitz/, Мөнхболдын Содбаяр /Techno4K/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.

The Huns Esports багийн бүрэлдэхүүнд дасгалжуулагч Батсүхийн Болд /ncl/, багийн ахлагч Гантулгын Есөнтөмөр /nin9/, Батболдын Баатархүү /Bart4k/, Ууганбаярын Анарбилэг /cobrazera/, Энхбатын Мөнхтогтох /xerolte/, Рийнагийн Билэгсайхан /Veccil/ нар тоглож байна.