Хот байгуулалт, барилга, орон сууцжуулалтын сайдын ээлжит шуурхай хуралдаан /2025.04.01/-ний өдөр “Барилга хөгжлийн төв” ТӨҮГ-т боллоо.

Сайдын шуурхай хуралдаанд ХББОСЯ-ны газар, хэлтсийн дарга нар, Газар зохион байгуулалт, геодези зураг зүйн газар, “Төрийн орон сууцны корпораци” ТӨХХК, “Барилга хөгжлийн төв” ТӨҮГ, зэрэг харьяа байгууллагын удирдлагууд оролцов. Шуурхай хуралдааныг ХББОСЯ-ны Төрийн захиргаа удирдлагын газрын дарга С.Батзаяа удирдаж, яамны газар, хэлтэс, харьяа байгууллагууд, төслийн нэгжүүд хийж хэрэгжүүлсэн ажил, сайдын өмнөх хуралдаанаар өгсөн үүрэг даалгаварын биелэлтээ танилцуулав.

Салбарын сайдын өнөөдрийн шуурхай хуралдаанаар бүтээн байгуулалтын улирал эхэлж байгаатай холбогдуулан барилгын салбарт баримталж ажиллах бодлого чиглэл, байр суурь, дэд бүтцийн салбарт шинээр хийгдэх ажлууд, түүнд тавих хяналт шалгалтыг эрчимжүүлэх, анхаарах шаардлагатай зарим асуудлыг өргөн хүрээтэй хэлэлцэв.

ХББОСЯ-ны Төрийн нарийн бичгийн дарга С.Төмөрхүү яамны харьяа байгууллага, төслийн нэгжүүдэд удааширч байгаа болон шийдвэрлүүлэх шаардлагатай яаралтай асуудлууд байгаа эсэхийг тодруулж, цаашид авч хэрэгжүүлэх арга хэмжээ, бодлого, үйл ажиллагааны хүрээнд дараах үүрэг чиглэлүүдийг өглөө.

• Эрхтэн шилжүүлэх төвийн барилгын асуудлыг шийдвэрлэх;

• Төв цэвэрлэх байгууламж дээр уулзалт хийж, 2 том цэвэрлэх байгууламжийн төслийг тодорхой болгох;

• Ногоон хөгжил эрчим хүчний хэмнэлттэй, “Best GER” аргачлалд аудит хийсэн тайлангийн төлөвлөгөө гаргаж танилцуулах;

• Барилга байгууламжийн норм, нормативийн хэлтсийн гэрээ хийсэн газруудтай уулзалт зохион байгуулах;

• Тусгай зөвшөөрөл эзэмшигчдийн алдагдалыг бууруулах;

Мөн ирэх онд Монгол Улсад шинэ цагийн барилгын салбар үүсэж хөгжсөний 100 жилийн түүхэн ой тохиох бөгөөд барилгын салбарын түүхт 100 жилийн ойг угтаж:

• “Ногоон нуур” 1008 айлын орон сууцны төслийн ажлыг эрчимжүүлэн, хүлээлгэж өгөх;

• “Солонго-1”, Солонго-2” хорооллыг ирэх жил үе шаттайгаар ашиглалтад оруулах;

• 960 хүүхдийн сургууль, дэд бүтэц холболтын асуудлыг шийдвэрлэж, 2026 оны төсөвт бүрэн суулгах тал дээр онцгойлон анхаарч, хяналт тавьж, шуурхай хуралдаанаас өгөгдсөн үүрэг даалгаварын биелэлтийг бүрэн хангаж ажиллахыг Хот байгуулалт, барилга, орон сууцжуулалтын сайд Ж.Батсуурь салбарын газар, хэлтэс, нэгжүүдэд үүрэг болголоо.