1,250,000 ам.долларын (3.5 тэрбум төгрөг) шагналын сантай “BLAST.tv Austin Major 2025” буюу CS2-ийн дэлхийн аварга шалгаруулах тэмцээний эхний шатны тоглолтууд зургадугаар сарын 3-ний өдөр эхлэлээ.

Энэ удаагийн тэмцээнд Монгол Улсаас анх удаа хоёр баг тоглох бөгөөд тэдний нэг болох "Chinggis Warriors" баг эхний шатандаа Европын шилдгүүдийн нэг "Heroic" багтай тоглож (7-13) харьцаагаар хожигдсон бол хоёр дахь тоглолтоо мөн адил нэг хожигдолтой Бразилийн "Legacy" багтай (10-13) харьцаагаар хожигдож манай залуус 2 хожигдолтой болоод байсан билээ.

Тэгвэл өнгөрсөн шөнө /2025.06.05/ Бразилийн "Fluxo" багтай тоглож 2-1 (Ancient 10-13, Mirage 13-11, Nuke 13-2) харьцаагаар хожиж CS2-ийн дэлхийн аварга шалгаруулах тэмцээн буюу мажорын анхны хожлоо байгууллаа. Тэд өнөөдөр шөнө /2025.06.06/ 01:30 цагт мөн адил нэг хожил, хоёр хожигдолтой байгаа Хятадын Lynn Vision багтай тоглоно. Улмаар хожвол мажорын хоёр дахь шатанд өрсөлдөх сүүлийн тоглолтод оролцох эрхтэй болох бол хожигдвол тэмцээнээ өндөрлүүлэх юм.

"Chinggis Warriors" багийн бүрэлдэхүүнд дасгалжуулагч П.Бадрал 'carnage', Б.Өнөдэлгэр 'controlez', З.Ундрахбаяр 'ROUX', Я.Ариунжаргал 'ariucle', Э.Төгс-Эрдэнэ 'efire', Б.Содбилэг 'cool4st' нар тоглож байна.

Харин The MongolZ багийн хувьд гуравдугаар шатнаас тоглолтууд эхлэнэ.

The MongolZ багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Мөнхболдын Содбаяр /Techno4K/, Бямбасүрэнгийн Гарьдмагнай /bLitz/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.