Электрон тоглоомын "CS2" төрлийн 1,250,000 ам.долларын (3.5 тэрбум төгрөг) шагналын сантай “IEM Cologne-2025” тэмцээн Герман улсын Кельн хотод болж байна.

Тус тэмцээний хоёрдугаар шатнаас Монголын "The MongolZ" баг оролцож байгаа бөгөөд А хэсгийн сүүлийн тоглолтоо өнгөрсөн шөнө Франц улсын Team Vitality багтай тоглож 0-2 (Mirage 5-13, Inferno 8-13, Overpass 0-0) харьцаагаар хожигдож шигшээ буюу хасагдах шатанд шилдэг 6 багаас тоглохоор боллоо.

Манай залуус Ланкс цэнгэлдэхэд анх удаа тоглох бөгөөд хагас шигшээд шалгарахын төлөөх тоглолтод Украйны Natus Vincere багтай наймдугаар сарын 1-нээс 2-нд шилжих шөнийн 01:00 цагт тоглоно. Хоёр баг сүүлд тавдугаар сард болсон PGL Astana 2025 тэмцээний хэсгийн шатанд тоглож 2-0 (Inferno 13-11, Mirage 13-11, Dust2 0-0) харьцаагаар хожиж байжээ. Улмаар энэ тэмцээнд хожвол В хэсгийн тэргүүлсэн ОХУ-ын Team Spirit багтай тоглох бол хожигдвол тэмцээнийг өндөрлүүлэх юм. 

Манай залуус Team Vitality багтай 2025 он гарснаас хойш таван удаа таарч тоглож бүгдэд нь хожигдоод байгаа бөгөөд сүүлд “BLAST.tv Austin Major 2025” буюу CS2-ийн дэлхийн аварга шалгаруулах тэмцээнд тоглож 1-2 (Mirage 13-5, Dust2 4-13, Inferno 6-13) харьцаагаар хожигдож байжээ. 

The MongolZ энэ тэмцээний А хэсгийн эхний тоглолтоо Францын 3DMAX багтай тоглож 2-0 (Nuke 13-2, Ancient 13-10, Inferno 0-0) харьцаагаар хожсон бол шигшээ шатанд өрсөлдөх эрхийн төлөө Европын холбооны Team Falcons багтай тоглож 2-0 (Dust2 13-9, Mirage 13-9, Ancient 0-0) харьцаагаар хожсон юм.

The MongolZ багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Мөнхболдын Содбаяр /Techno4K/, Бямбасүрэнгийн Гарьдмагнай /bLitz/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.