Электрон тоглоомын "CS2" төрлийн 1,250,000 ам.долларын (3.5 тэрбум төгрөг) шагналын сантай “IEM Cologne-2025” тэмцээн Герман улсын Кельн хотод болж байна.

Тус тэмцээний хасагдах буюу шигшээ шатны тоглолт өнгөрсөн шөнө /2025.08.01/ болж Монголын "The MongolZ" баг болон Украйн улсын Natus Vincere багтай Ланкс цэнгэлдэхэд тоглож 0-2 (Inferno 18-22, Ancient 6-13, Mirage 0-0) харьцаагаар хожигдлоо. Улмаар манай залуус тэмцээнээ 5-6 байраар өндөрлүүлж 40 мянган ам.доллар хүртэж байгаа бол Natus Vincere баг хагас шигшээп ОХУ-ын Team Spirit багтай тоглохоор боллоо.

The MongolZ энэ тэмцээнд хоёрдугаар шатнаас тоглож эхэлсэн бөгөөд А хэсгийн эхний тоглолтоо Францын 3DMAX багтай тоглож 2-0 (Nuke 13-2, Ancient 13-10, Inferno 0-0) харьцаагаар хожсон бол шигшээ шатанд өрсөлдөх эрхийн төлөө Европын холбооны Team Falcons багтай тоглож 2-0 (Dust2 13-9, Mirage 13-9, Ancient 0-0) харьцаагаар хожсон юм. Тус тэмцээний  Монголын "The MongolZ" баг оролцож байгаа бөгөөд А хэсгийн сүүлийн тоглолтоо өнгөрсөн шөнө Франц улсын Team Vitality багтай тоглож 0-2 (Mirage 5-13, Inferno 8-13, Overpass 0-0) харьцаагаар хожигдож шигшээ буюу хасагдах шатанд шилдэг 6 багаас тоглохоор болсон билээ.

Манай залуусын дараагийн тэмцээн нь Европоосоо онлайнаар оролцох BLAST Bounty S2 байх бөгөөд эхний тоглолт нь наймдугаар сарын 8-нд 17:00 цагаас Финландын ENCE багийн эсрэг тоглох юм.

The MongolZ багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Мөнхболдын Содбаяр /Techno4K/, Бямбасүрэнгийн Гарьдмагнай /bLitz/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.