Найз нь Ерөнхийлөгчтэй дотно харилцаатай гэх байдлаа ашиглан өөрийн сандаа хандив нэрийдлээр их хэмжээний авлига авсан, мөн улс төрийн хэрэгт оролцуулж байсан гэх хэрэгт холбогдон ард түмний эсэргүүцэлтэй нүүр тулаад буй БНСУ-ын Ерөнхийлөгч Пак Гын Хе Ерөнхий сайд нарын гурван өндөр дээд албан тушаалтнаа солих шийдвэрийг гаргажээ.

Улмаар шинээр томилогдох Ерөнхий сайдад экс Ерөнхийлөгч Ро Му Хюны ойрын хүн гэгддэг байсан Ким Бён Жуны нэрийг дэвшүүлсэн байна. Түүнчлэн, Эдийн засгийн дэд сайд, Үндэсний аюулгүй байдлын газрын дарга нарын хүмүүсийг өөрчлөхөөр болсон аж.

Ерөнхийлөгч Пак Гын Хегийн удаан хугацааны турш нөхөрлөж ирсэн найз Чой Сун Силийг Засгийн газрын гишүүнээр томилох зэргээр улс төрд оролцуулж байсан гэх дуулиан шуугиан ид хүчээ авч байгаа юм.

Тиймээс БНСУ-ын Ерөнхийлөгч “төвийг сахисан” байр суурийг эрхэмлэх Засгийн газрыг бүрдүүлж, ард түмний эсэргүүцлийг намдаах бодлого баримталж буй нь энэ аж.