“Монголын үндэсний музейн сан хөмрөгт бүртгэлийн зураасан кодны систем нэвтрүүлэх нь” төсөл энэ сараас эхлэн хэрэгжихээр боллоо.

Энэхүү төсөл нь тэтгэлгийн хүрээнд нэг жилийн хугацаатай хэрэгжих ажээ. Тодруулбал,  АНУ-ын Элчин сайдын Соёлын өвийг хамгаалах  сангаас жил бүр дэлхий нийтээр зарладаг төслийн уралдаанд 2016 оны санхүүгийн жилд Монголын үндэсний музей, Америкийн Монгол судлалын төвтэй хамтран төсөл бичсэн нь шалгарч, улмаар тэтгэлэг авсан байна.

Одоогоор Монгол Улс дахь соёлын өвийн улсын нэгдсэн бүртгэл, мэдээллийн сангийн цахим бүртгэл Register программ нь үзмэр нэг бүрийн хөдөлгөөнийг хянадаггүй. Зөвхөн холбогдох мэдээллүүдийг бүртгэх төдий байгаа аж. Иймд энэ ажил нь Монголын үндэсний музей төдийгүй соёлын өвийн улсын нэгдсэн бүртгэл, мэдээллийн санд шинэ техник, технологи нэвтрүүлсэн Монголын музейн хөгжлийг нэг шатаар ахуйлсан ач холбогдолтой ажил юм.