Хуульч Р. Булгамаа өөрийн цахим хуудсанд нэгэн нийтлэл оруулсан байна. Тодруулбал

"Бусдын амь насанд бүлэглэн халдаж, заналхийлсэн онц ноцтой хэрэг дээр хүртэл ийм хариуцлагагүй хандаж болох уу...

Сүүлийн өдрүүдэд шалгагдаж байгаа нэгэн ноцтой хэргийн талаар хуульчийн хувьд байр сууриа илэрхийлэх нь зүйтэй гэж үзлээ.

Хэргийн шинж байдлыг харахад бизнес эрхэлдэг нэгэн иргэнийг урьдчилан зохион байгуулалттайгаар авч явж, улмаар араас нь хэд хэдэн автомашинтай хүмүүс ирж бүлэглэн зодож, цахилгаан бороохой хүртэл ашиглан биед нь халдаж, өөрийнх нь болон гэр бүлийн гишүүдийн амь насанд заналхийлсэн, олон цагийн турш хүч хэрэглэн хорьж саатуулсан, хүзүүнд нь хутга тулган компанийнх нь эд хөрөнгө, хувьцааг хүчээр шилжүүлэхийг тулгаж, нотариат дуудан гэрээ, хэлцэл дээр гарын үсэг зуруулсан, хэлцэл амжилттай боллоо хэмээн зочид буудалд аваачин хар тамхи хэрэглэхийг шаардаж олон цаг эрүүдэн шүүхэд хохирогч амь гуйсаар гарч зугатаасан гэх маш ноцтой нөхцөл байдал яригдаж байна.

Мөн энэ хэрэгтэй холбоотойгоор мансууруулах бодис худалдан авч, зочид буудалд бүлэглэн хэрэглэсэн байж болзошгүй асуудал ч яригдаж байгаа нь өөрөө Эрүүгийн хуулиар тусгайлан хориглосон ноцтой гэмт хэргийн шинжтэй үйлдэл юм.

Ийм төрлийн хэрэг дээр мөрдөн шалгах ажиллагаа ялангуяа шуурхай явагдах ёстой. Учир нь хэрэгт холбогдсон этгээдүүдийг сул чөлөөтэй байлгах нь:

• Гэмт этгээдүүд хоорондоо үгсэн хуйвалдах,
• Нотлох баримт устгах, нуун дарагдуулах,
• Гэрч, хохирогчид дарамт шахалт үзүүлэх,
• Дахин гэмт хэрэг үйлдэх
• Оргон зайлах бодит эрсдэлийг бий болгодог.

Ийм ноцтой хэрэг гарсан байхад хэрэг учралын газарт очсон бие бүрэлдэхүүн тухайн нөхцөл байдлыг зөв үнэлж, шууд өргөн бүрэлдэхүүнтэй ажлын хэсэг гарган, холбогдох албадтай хамтарч шуурхай ажиллагаа явуулах шаардлагатай байдаг.

Бүр тодруулбал, бүлэглэн бусдын биед халдсан, зэвсэг хэрэглэсэн, заналхийлсэн шинжтэй хэрэг дээр оролцсон байж болзошгүй этгээдүүдийг шуурхай олж тогтоон, мэдүүлэг авч, мөрдөн шалгах ажиллагааг яаралтай явуулах нь хууль зүйн практикт зайлшгүй шаардлагатай ажиллагаанд тооцогддог.

Гэтэл ийм төрлийн ноцтой хэрэг гарсан байхад гэмт хэрэгт холбогдсон байж болзошгүй этгээдүүдийг олж тогтоох, мэдүүлэг авах ажиллагааг өмгөөлөгч, хохирогчийн зүгээс шаардаж явж байж хийгддэг байж болохгүй. Энэ бол өөрөө эрүүгийн хэрэг хянан шийдвэрлэх ажиллагааны зорилготой нийцэхгүй асуудал юм. Гэтэл мансууруулах бодис хэрэглэсэн байж болзошгүй нөхцөл байдал илэрсэн байхад “хар тамхины алба шалгана биз” гэж асуудлыг хойш тавих байдлаар хандаж болохгүй асуудал юм. Түүнчлэн Мансууруулах эм, сэтгэцэд нөлөөт бодис хэрэглэх орон байраар хангасан гэмт хэргийн шинжтэй үйлдэлд холбогдуулан зочид буудлыг ч шалгах хуультай.

Дуудлага өгсөн иргэн, гэрчүүд хар тамхи хэрэглэсэн эсэхийг шалгах сорил авахуулах талаар шаардаж, тэр бүү хэл тестийг хэрхэн ашиглах талаар хөндлөнгийн этгээдээс ChatGPT-c асууж зааварчлуулж байж ажиллагаа явагдаж байгаа мэт байдал үүсч байгаа нь өөрөө анхаарал татах асуудал юм.

Мөн амь насанд заналхийлэлд өртөж, амиа алдахын наагуур зугтаж гарч ирсэн иргэний асуудлыг зөвхөн мэдүүлэг аваад, маргааш нь хэсгийн байцаагчид шилжүүлсэн гэж тайлбарлах нь хүний эрх, аюулгүй байдлыг бодитоор хамгаалж байгаа хэлбэр гэж хэлэхэд хүндрэлтэй байна.

Ийм төрлийн хэргийг энгийн нэг өргөдөл, гомдлын түвшинд биш, онц ноцтой нөхцөл байдал гэж үзэж, шуурхай, нэгдсэн удирдлагатайгаар мөрдөн шалгах ажиллагаа явуулдаг тогтолцоо, хандлага зайлшгүй шаардлагатай байна...

Хамгийн гол нь хууль хяналтын байгууллагын ажиллагаа хэн нэгний эд хөрөнгө, албан тушаалын нөлөө, боломж бололцооноос хамаарч удааширдаг, ялгаатай ханддаг гэх ойлголт нийгэмд төрж хэрхэвч болохгүй.

Хууль бол хүнээсээ, мөнгөнөөсөө хамаарч өөр өөрөөр хэрэгждэг байж болохгүй.

Энэ бол нэг_хүний асуудал биш.

Өнөөдөр нэг хүн ийм нөхцөлд орж байхад маргааш хэн ч хохирогч болж болзошгүй.

Хууль_хэрэгждэг_байх_ёстой.

Хууль хүн бүрт тэгш үйлчлэх ёстой.

Хуульч Р. Булгамаа. 2026.03.31" хэмээсэн байна.