Сагсан бөмбөгийн FIBA 3x3 дэлхийн аварга шалгаруулах тэмцээн Польшийн Варшав хотод энэ сарын 1-ээс 7-ны хооронд болно. Тус тэмцээнд Монгол Улсын 3х3 сагсан бөмбөгийн эрэгтэй шигшээ болон эмэгтэй шигшээ багууд оролцож байгаа.

Эрэгтэй шигшээ В хэсэгт орж өнгөрсөн шөнө хоёр тоглолт хийсэн бөгөөд эхний тоглолтоо Чехийн багтай хийж 14-17 харьцаагаар хожигдсон. Тус тоглолтод Э.Сугар-Очир 5 оноо, Г.Дөлгөөн 5 оноо, 7 самбар, Г.Болор-Эрдэнэ 4 оноо, 5 дамжуулалтыг гүйцэтгэсэн байна. Харин дараагийн тоглолтоо талбайн эзэн Польшийн багтай хийж 21-19 харьцаагаар хожиж эхний хожлоо байгууллаа. Тус тоглолтод А.Ананд 9 оноо, 5 дамжуулалтаар багаа тэргүүлсэн бол Г.Болор-Эрдэнэ 5 оноо, 5 дамжуулалт, Г.Дөлгөөн 4 оноо, Э.Сугар-Очир 3 оноог авчээ.

Улмаар тэд маргааш шөнө буюу зургадугаар сарын 5-ны шөнө 01:20 цагт АНУ-ын багтай хийх бол хэсгийн сүүлийн тоглолтоо 03:10 цагт Латвийн багтай хийнэ.